കോതമംഗലം: അൽ അൻവാർ ജസ്റ്റിസ് ആൻ്റ് വെൽഫെയർ അസോസിയേഷൻ (അജ് വ) എന്ന ജീവകാരുണ്യ സംഘടയുടെ കോതമംഗലം ഏരിയാ കമ്മിറ്റിയുടെ നേതൃത്വത്തിൽ സമാഹരിച്ച ഒന്നരലക്ഷം രൂപയുടെ മെഡിക്കൽ ഉപകരണങ്ങൾ നാടിന് സമർപ്പിച്ചു. അടിവാട് കവലയിൽ നടന്ന സമർപ്പണ സമ്മേളനം എം എൽ എ ആൻ്റണി ജോൺ ഉദ്ഘാടനം ചെയ്തു. ഏരിയാ പ്രസിഡൻ്റ് എം എം കാസിം അദ്ധ്യക്ഷത വഹിച്ച ചടങ്ങിൽ ബ്ലോക്ക് പഞ്ചായത്ത് പ്രസിഡൻ്റ് പി എ എം ബഷീർ, പല്ലാരിമംഗലം പഞ്ചായത്ത് വൈസ് പ്രസിഡൻ്റ് ഒ ഇ അബ്ബാസ് എന്നിവർ മെഡിക്കൽ ഉപകരണങ്ങൾ നാടിന് സമർപ്പിച്ചു.
വി എച്ച് അലിയാർ ഖാസിമി മുഖ്യ പ്രഭാഷണം നടത്തി. വൈസ് പ്രസിഡൻ്റ് നിസാമോൾ ഇസ്മയിൽ, പഞ്ചായത്തംഗം എ എ രമണൻ, ചെമ്പഴ ജുമാമസ്ജിദ് ഇമാം മുഹമ്മദ് അൻവർ ബാഖവി, അജ് വ ജില്ലാ പ്രസിഡൻ്റ് അബൂബക്കർ അത്താണി, ജില്ലാ സെക്രട്ടറി നവാസ് നെടിയേടം, ഏരിയാ സെക്രട്ടറി റഹീം അയിരൂർപ്പാടം, ഷിയാസ് മൈലൂർ, അഷറഫ് അടിവാട്, ഷംസുദ്ധീൻ വെള്ളക്കാമറ്റം എന്നിവർ പ്രസംഗിച്ചു.
