മൂവാറ്റുപുഴ: റാക്കാട് നാന്തോട് ജംഗ്ഷന് സമീപത്തെ വാടകവീട്ടില്‍ നിന്ന് 32 ഗ്രാം എംഡിഎംഎ പിടികൂടിയ കേസില്‍ രണ്ടാം പ്രതി മൂവാറ്റുപുഴ പോലീസിന്റെ പിടിയില്‍. ഒന്നാം പ്രതിയായ കോതമംഗലം കോട്ടപ്പടി ചിരട്ടക്കല്‍ മിനിമോള്‍ക്കൊപ്പം താമസിച്ചുവന്നിരുന്ന കോട്ടപ്പടി കാപ്പാംകുഴിയില്‍ ബഷീറിനെയാണ് പെരുമ്പാവൂരില്‍ നിന്ന് മൂവാറ്റുപുഴ പോലീസ് പിടികൂടിയത്. എറണാകുളം ജില്ലാ പോലീസ് മേധാവിയുടെ പ്രത്യേക അന്വേഷണ സംഘമായ തൂഫാന്‍ സ്‌ക്വാഡ് ഒരു മാസമായി പ്രതികളെ രഹസ്യമായി നിരീക്ഷിച്ചുവരികയായിരുന്നു. ഇതേ തുടര്‍ന്നാണ് ബുധനാഴ്ച ഒന്നാം പ്രതിയെ പോലീസ് പിടികൂടിയത്. ദിവസങ്ങള്‍ക്ക് മുന്‍പാണ് പ്രതികള്‍ റാക്കാട് വീട് വാടകയ്ക്കെടുത്ത് താമസം തുടങ്ങിയത്.
പിടിയിലായ മിനിമോള്‍ വിവിധ സ്റ്റേഷനുകളില്‍ നിരവധി കേസുകളില്‍ പ്രതിയാണ്. കോതമംഗലം സ്റ്റേഷനില്‍ മുക്കുപണ്ടം പണയം വെച്ച് തട്ടിപ്പ് നടത്തിയ കേസില്‍ ജാമ്യത്തിലിറങ്ങി 13 ദിവസം പിന്നിടുമ്പോഴാണ് വീണ്ടും പിടിയിലാകുന്നത്.പ്രത്യേകം പാക്ക് ചെയ്ത് സൂക്ഷിച്ച നിലയിലാണ് എംഡിഎ കണ്ടെത്തിയത്. പ്രതികള്‍ താമസിച്ചുവന്നിരുന്ന വാടക വീട്ടില്‍ നിന്നും ഇലക്ട്രോണിക് ത്രാസും പോലീസ് കണ്ടെടുത്തു. ഒളിവില്‍ കഴിയുകയായിരുന്ന ബഷീറിനെ മൂവാറ്റുപുഴ പോലീസ് വ്യാഴാഴ്ചയാണ് പെരുമ്പാവൂരില്‍ നിന്ന് പിടികൂടിയത്.
ബഷീറിനെതിരെ മറ്റ് രണ്ട് സ്റ്റേഷനുകളില്‍ കഞ്ചാവ് കേസുകളുണ്ടെന്നും ഒരുവര്‍ഷമായി എംഡിഎംഎ വില്‍പ്പന നടത്തിവരുകയായിരുന്നുവെന്നും മൂവാറ്റുപുഴ സര്‍ക്കിള്‍ ഇന്‍സ്‌പെക്ടര്‍ ഫൈസല്‍ എം.എസ് പറഞ്ഞു.രാസലഹരിയുടെ ഉറവിടത്തെ പറ്റിയും, സാമ്പത്തിക സ്രോതസിനെ പറ്റിയും പ്രതികളില്‍നിന്ന് മയക്കുമരുന്ന് വാങ്ങുന്നവരെക്കുറിച്ചും അന്വേഷണം നടത്തി വരുകയാണെന്ന് പോലീസ് അറിയിച്ചു. കോടതിയില്‍ ഹജരാക്കിയപ്രതിയെ റിമാന്‍ഡ് ചെയ്തു.
