കോതമംഗലം: കടുത്ത വേനലില് പെരിയാര്വാലി കോതമംഗലം ബ്രാഞ്ച് കനാലില് ജലവിതരണം മുടങ്ങിയിട്ടു രണ്ടാഴ്ച പിന്നിട്ടു. കിഴക്കേ കോതമംഗലം മേഖലയില് ജലക്ഷാമം രൂക്ഷമാണ്. വാട്ടര് അതോറിറ്റിയുടെ കോഴിപ്പിള്ളിയിലെ പമ്പിംഗിനെയും ജലക്ഷാമം ബാധിച്ചു തുടങ്ങി. മെയിന് കനാലില് നിന്നു ബ്രാഞ്ച് കനാലിലേക്കു വെള്ളം വിടുന്നുണ്ടെങ്കിലും ചിലയിടങ്ങളില് ബണ്ട് ഇടിച്ചിലും പായല് നിറഞ്ഞതും മൂലമാണ് താഴ്ഭാഗങ്ങളിലേക്കുവെള്ളമെത്താത്തത്.
കനാല് ശുചീകരിച്ച് ജലവിതരണം സുഗമമാക്കാന് നാട്ടുകാര് നിരന്തരം ആവശ്യപ്പെടുന്നുണ്ടെങ്കിലും തൊഴിലാളികളെ ലഭിക്കുന്നില്ലെന്നാണ് പെരിയാര്വാലി അധികൃതരുടെ വിശദീകരണം. മലയിന്കീഴിന് കിഴക്കോട്ടുള്ള അരമനപ്പടി, അമ്പലപ്പറമ്പ്, അയ്യങ്കാവ്, വായനശാലപ്പടി, കുത്തുകുഴി, മാരമംഗലം ഭാഗത്ത് കനാലില് വെള്ളമെത്താത്തതിനാല് പ്രദേശത്തെ കിണറുകളും കുളങ്ങളുമുള്പ്പെടെയുള്ള ശുദ്ധജല സ്രോതസുകള് വറ്റി. കനാല്വെള്ളത്തെ ആശ്രയിച്ചുള്ള കൃഷികളും കരിഞ്ഞുണങ്ങി.
വേനല്ക്കാലത്ത് കനാലിലൂടെയെത്തുന്ന വെള്ളത്തെ ആശ്രയിച്ചാണ് കോഴിപ്പിള്ളിയില് ശുദ്ധജലവിതരണ പദ്ധതിയുടെ പമ്പിംഗ്. കനാലില് വെള്ളമെത്തിക്കാന് അടിയന്തര നടപടിയുണ്ടായില്ലെങ്കില് മേഖലയില് ശുദ്ധജലവിതരണവും താറുമാറാകും.
