കോതമംഗലം: കോതമംഗലത്തുണ്ടായ ശക്തമായ കാറ്റിലും മഴയിലും വന് നാശനഷ്ടം. തിങ്കളാഴ്ച വൈകിട്ടുണ്ടായ കാറ്റില് നെല്ലിക്കുഴി യുഗദീപ്തി ഗ്രന്ഥശാലയുടെ ടി.എം മീതിയന് സ്മാരക ഹാളിന്റെ ഷീറ്റ് മേഞ്ഞ മേല്ക്കൂര പറന്നു പോയി. ഇത് സമീപത്തെ ഷോപ്പിംഗ് കെട്ടിടത്തില് വീണ് ഒന്നര ലക്ഷം രൂപയുടെ നാശനഷ്ടം സംഭവിച്ചു. നെല്ലിക്കുഴി, പിണ്ടിമന, കോട്ടപ്പടി, പൈങ്ങോട്ടൂര്, കുട്ടമ്പുഴ പഞ്ചായത്തുകളിലും കോതമംഗലം നഗരസഭയിലും വന് കൃഷിനാശം സംഭവിച്ചു.
2250 കുലച്ച എത്തവാഴകള്, 1475 കുലയ്ക്കാത്ത വാഴകള്, കായ്ക്കുന്ന 40 ജാതികള്, കായ്ക്കുന്ന 20 കമുകുകള്, 7 തെങ്ങുകള്, 80 റബ്ബര് മരങ്ങള് എന്നിവയ്ക്ക് നാശം സംഭവിച്ചിട്ടുണ്ട്. 90 കര്ഷകരുടെ വിളകള്ക്കാണ് നഷ്ടം. കോതമംഗലം പള്ളിമാലില് റെജി മത്തായിയുടെ വാഴത്തോട്ടം പൂര്ണമായും നശിച്ചു. കുട്ടമ്പുഴയില് രണ്ട് വീടുകള്ക്ക് നാശനഷ്ടമുണ്ടായി. വിവിധ പഞ്ചായത്തുകളില് 25 ലക്ഷം രൂപയുടെ കൃഷിനാശം സംഭവിച്ചതായാണ് കൃഷി വകുപ്പിന്റെ പ്രാഥമിക കണക്ക്. പിണ്ടിമന പഞ്ചായത്തിലാണ് കൂടുതല് നാശനഷ്ടമുണ്ടായത്.
