മൂവാറ്റുപുഴ: റാക്കാട് നാന്തോട് ജംഗ്ഷന് സമീപത്തെ വാടകവീട്ടില്‍ നിന്ന് 32 ഗ്രാം എംഡിഎംഎയുമായി യുവതി പോലീസ് പിടിയില്‍. കോതമംഗലം ഓടക്കാലി സ്വദേശിനി മിനിമോളെയാണ് പോലീസ് പിടികൂടിയത്. ഒപ്പമുണ്ടായിരുന്ന ബഷീര്‍ എന്നയാള്‍ക്കായി പോലീസ് അന്വേഷണം ഊര്‍ജ്ജിതമാക്കി.
എംഡിഎംഎ കൂടാതെ ഇത് ഉപയോഗിക്കുന്നതിനുള്ള വിവിധ ഉപകരണങ്ങളും വീട്ടില്‍ നിന്ന് കണ്ടെടുത്തു. ലഹരിവില്‍പന ലക്ഷ്യമിട്ട് ബാംഗ്ലൂരില്‍ നിന്നെത്തിച്ചതാകാമെന്നാണ് പോലീസിന്റെ നിഗമനം. എറണാകുളം ജില്ലാ പോലീസ് മേധാവിയുടെ പ്രത്യേക അന്വേഷണ സംഘമായ തൂഫാന്‍ സ്‌ക്വാഡ് ഒരു മാസമായി ഇവരെ രഹസ്യമായി നിരീക്ഷിച്ചുവരികയായിരുന്നു.
മൂവാറ്റുപുഴ ഡിവൈഎസ്പി കെ.ആര്‍ മനോജിന്റെ മേല്‍നോട്ടത്തിലുള്ള സംഘമാണ് റെയ്ഡ് നടത്തിയത്. ദിവസങ്ങള്‍ക്ക് മുന്‍പാണ് ഇവര്‍ ഇവിടെ വീട് വാടകയ്ക്കെടുത്ത് താമസം തുടങ്ങിയത്. പിടിയിലായ മിനിമോള്‍ വിവിധ സ്റ്റേഷനുകളില്‍ നിരവധി കേസുകളില്‍ പ്രതിയാണ്. കോതമംഗലം സ്റ്റേഷനില്‍ മുക്കുപണ്ടം പണയം വെച്ച് തട്ടിപ്പ് നടത്തിയ കേസില്‍ ജാമ്യത്തിലിറങ്ങി 13 ദിവസം പിന്നിടുമ്പോഴാണ് വീണ്ടും പിടിയിലാകുന്നത്. ഒളിവിലുള്ള ബഷീറിനെതിരെ മറ്റ് രണ്ട് സ്റ്റേഷനുകളില്‍ കഞ്ചാവ് കേസുകളുണ്ട്.
ജില്ലാ പോലീസ് മേധാവിയുടെ പ്രത്യേക നിര്‍ദ്ദേശപ്രകാരം എഎസ്‌ഐമാരായ അനീഷ്, അനസ്, സീനിയര്‍ സിവില്‍ പോലീസ് ഓഫീസര്‍മാരായ വര്‍ഗീസ്, ദയേഷ്, ഷിയാസ്, സിജാസ്, ശ്രീജു എന്നിവരുടെ നേതൃത്വത്തിലായിരുന്നു റെയ്ഡ്.
