കോതമംഗലം: വ്യവസായ-അക്കാദമിക് സഹകരണം ശക്തിപ്പെടുത്തുന്നതിനും വിദ്യാര്ത്ഥികള്ക്കും അധ്യാപകര്ക്കും ഗവേഷണ, പരിശീലന, നൈപുണ്യ വികസന അവസരങ്ങള് ഒരുക്കുന്നതിനുമായി കോതമംഗലം മാര് അത്തനേഷ്യസ് എഞ്ചിനീയറിംഗ് കോളേജും, കേരള ഇലക്ട്രിക്കല് ആന്റ് അലൈഡ് എഞ്ചിനീയറിംഗ് കമ്പനി ലിമിറ്റഡും തമ്മില് ധാരണാപത്രം ഒപ്പുവെച്ചു. കോളേജ് പ്രിന്സിപ്പല് ഡോ. ബോസ് മാത്യു ജോസ് കെ.ഇ.എല് മാനേജിംഗ് ഡയറക്ടര് കേണല് ഷാജി എം. വര്ഗീസ് എന്നിവര് ധാരണാപത്രം കൈമാറി.
വിദ്യാര്ത്ഥികള്ക്കായി ഇന്റേണ്ഷിപ്പുകള്, വ്യവസായ കേന്ദ്രീകൃത പ്രോജക്ടുകള്, ഗവേഷണ സഹകരണം, നൈപുണ്യ വികസന പരിശീലനങ്ങള് എന്നിവ സംഘടിപ്പിക്കുന്നതിനാണ് ധാരണാപത്രത്തിലൂടെ ലക്ഷ്യമിടുന്നത്. വ്യവസായ രംഗത്തിന്റെ ആവശ്യങ്ങളുമായി എഞ്ചിനീയറിംഗ് വിദ്യാഭ്യാസത്തെ കൂടുതല് ബന്ധിപ്പിക്കുന്നതിനും വിദ്യാര്ത്ഥികളുടെ തൊഴില്സാധ്യത വര്ധിപ്പിക്കുന്നതിനും ഈ സഹകരണം സഹായകരമാകും. കോളേജിനെ പ്രതിനിധീകരിച്ച് ഇലക്ട്രോണിക്സ് ആന്റ് കമ്മ്യൂണിക്കേഷന് എഞ്ചിനീയറിംഗ് വിഭാഗം മേധാവി ഡോ. അജി ജോയ്, ഇലക്ട്രിക്കല് ആന്ഡ് ഇലക്ട്രോണിക്സ് എഞ്ചിനീയറിംഗ് വിഭാഗം മേധാവി ഡോ. സിനി പോള്, ഇന്ഡസ്ട്രി-ഇന്സ്റ്റിറ്റിയൂഷന് കോ-ഓര്ഡിനേറ്റര് ഡോ. സാബു കുര്യന്, ഇലക്ട്രിക്കല് എഞ്ചിനീയറിംഗ് വിഭാഗം അസിസ്റ്റന്റ് പ്രൊഫസര് ഡോ. സച്ചിന് ജീ പോള് എന്നിവരും കെ.ഇ.എല്ലിനെ പ്രതിനിധീകരിച്ച് പ്രോജക്ട് ഡെവലപ്മെന്റ് വിഭാഗം മേധാവി സജീവ് ദേവ്, ജനറല് മാനേജര് മാമല യൂണിറ്റ് ഹെഡ് എന്.ആര് മിനി എന്നിവരും പങ്കെടുത്തു
