കോതമംഗലം: എം.എ. എന്‍ജിനീയറിംഗ് കോളേജ് ഹോസ്റ്റല്‍ കെട്ടിടത്തിന് മുകളിൽ നിന്ന് വീണ് വിദ്യാര്‍ത്ഥി മരിച്ചു. തിരുവനന്തപുരം വെഞ്ഞാറമൂട് പള്ളിമുക്ക് മൈയിലോട്ടുകൊണോത്ത് പുത്തന്‍വീട്ടില്‍ ജി. വിജയന്‍ പിള്ളയുടെ മകന്‍ വി. ആയേഷ് (20) ആണ് മരിച്ചത്. മൂന്നാം വര്‍ഷം (അഞ്ചാം സെമസ്റ്റർ) എ.ഐ. മെഷീന്‍ ലേണിംഗ് ബ്രാഞ്ച് വിദ്യാര്‍ത്ഥിയാണ്. വ്യാഴാഴ്ച വൈകുന്നേരം 5.10 ഓടെയാണ് സംഭവം. ഹോസ്റ്റല്‍ കെട്ടിടത്തിന്റെ ആറാം നിലയില്‍നിന്നാണ് താഴേക്ക് വീണത്. ആയേഷ് ഗോവണി വെച്ച് കെട്ടിടത്തിന് മുകളില്‍ കയറുന്നത് സമീപത്തെ സ്‌പോട്‌സ് ഹോസ്റ്റല്‍ കെട്ടിടത്തിലെ ഒരു വിദ്യാര്‍ത്ഥി കണ്ടിരുന്നതായി പോലീസ് പറഞ്ഞു.
ഹോസ്റ്റലിന്റെ പ്രവേശന കവാടത്തിന് സമീപത്തെ പുല്‍ത്തകിടിയില്‍ വീണ വിദ്യാര്‍ത്ഥിയെ അഗ്നി രക്ഷാസേന എത്തിയാണ് കോതമംഗലത്തെ സ്വകാര്യ ആശുപത്രിയില്‍ എത്തിച്ചത്. സാരമായി പരിക്കേറ്റ ആയേഷിനെ പിന്നീട് ആലുവായിലെ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും രാത്രി 8.30- ഓടെ മരിച്ചു. മൃതദേഹം ആശുപത്രി മോര്‍ച്ചറിയില്‍. വെള്ളിയാഴ്ച പോസ്റ്റുമോര്‍ട്ടത്തിന് ശേഷം ബന്ധുക്കള്‍ക്ക് വിട്ടുനല്‍കും. മാതാവ് : ഐ. അനിത.
