കോതമംഗലം – സാമൂഹ്യ ദ്രോഹികളുടെ കൊടും ക്രൂരത; കുട്ടമ്പുഴ ഉരുളൻതണ്ണിയിൽ വളർത്തുനായ്ക്കളെ വിഷം കൊടുത്ത് കൊലപ്പെടുത്തി; ഇന്ന് രാവിലെയാണ് നായ്ക്കളെ കൂടുകളിൽ ചത്ത നിലയിൽ കണ്ടെത്തിയത്. വീടുകളിൽ പൂട്ടിയിട്ട് ഓമനിച്ച് വളർത്തിയിരുന്ന നായ്ക്കളെയാണ് കാഞ്ഞിരത്തിൻ്റെ തൊലി ഇറച്ചിയിലിട്ട് വേവിച്ച് നൽകിയിരിക്കുന്നത്. മൂന്ന് നായ്ക്കൾ ചത്തു. ഒരെണ്ണം മരണ തുല്യമായി മുറ്റത്ത് കിടക്കുകയാണ്.
ചെറായി ഗോമതി, എറമ്പിൽ സാറാക്കുട്ടി, താഴത്തേക്കുടി എൽദോസ് എന്നിവരുടെ വളർത്തുനായ്ക്കളാണ് ചത്തത്. പോലീസിൽ പരാതി നൽകിയിട്ടുണ്ട്. നായ്ക്കളെ കൊലപ്പെടുത്തിയ സാമൂഹ്യ വിരുദ്ധരെ കണ്ടെത്തി നിയമ നടപടികൾ സ്വീകരിക്കണമെന്ന് വാർഡ് മെമ്പർ ജോഷി പൊട്ടക്കൽ ആവശ്യപ്പെട്ടു.
