കോതമംഗലം: കുട്ടമ്പുഴ കൂവപ്പാറയില് ജനവാസ മേഖലയിലെ കിണറ്റില് അകപ്പെട്ട കാട്ടാനയെ കരക്ക് കയറ്റി കാട്ടിലേക്ക് തുരത്തി. ചൊവ്വാഴ്ച പുലര്ച്ചെയോടെ കൂട്ടംതെറ്റിയെത്തിയ കാട്ടാന ജനവാസ മേഖലയിലെ കിണറ്റില് വീഴുകയായിരുന്നു. മണിക്കൂറുകള് നീണ്ട പരിശ്രമത്തിനൊടുവില് 2.30 ഓടെ ജെസിബിയുടെ സഹായത്തോടെയാണ് ആനയെ കരക്ക് കയറ്റിയത്.
മണ്ണുമാന്തി യന്ത്രം ഉപയോഗിച്ച് കിണറ്റിന്റെ ഒരു ഭാഗം ഇടിച്ച്, ആനയ്ക്ക് കയറിവരാനുള്ള മണ്തിട്ട ഒരുക്കിയാണ് ആനയെ കരക്ക് കയറ്റിയത്. കൂവപ്പാറ സ്വദേശിയുടെ പുരയിടത്തിലെ കിണറ്റിലാണ് കാട്ടാന വീണത്. ആനയെ മയക്കുവെടി വെക്കണമെന്ന് നാട്ടുകാര് ആവശ്യപ്പെട്ടതിനെ തുടര്ന്ന് രക്ഷാപ്രവര്ത്തനം നിര്ത്തിവച്ചിരുന്നു. തുടര്ന്ന് ഉച്ചകഴിഞ്ഞ് രക്ഷാപ്രവര്ത്തനം പുനരാരംഭിക്കുകയായിരുന്നു.വനംവകുപ്പിന്റെ നേതൃത്വത്തില് യുദ്ധകാലാടിസ്ഥാനത്തിലാണ് രക്ഷാപ്രവര്ത്തനം നടത്തിയത്. കരക്കുകയറ്റിയ ആനയെ വരും ദിവസങ്ങളില് വനം വകുപ്പിന്റെ നേതൃത്വത്തില് നിരീക്ഷിക്കുമെന്ന് ഷിബു തെക്കുംപുറം എംഎല്എ പറഞ്ഞു. നേരിയ പരിക്കുകളുണ്ടെങ്കിലും ആനയുടെ ആരോഗ്യനില നിലവില് തൃപ്തികരമാണെന്ന് വനംവകുപ്പ് അധികൃതര് അറിയിച്ചു.
