കോതമംഗലം:കാട്ടാനശല്യത്തിനെതിരെ സര്‍ക്കാര്‍ അടിയന്തര നടപടി സ്വീകരിക്കണമെന്നും ജനങ്ങളുടെ ജീവനും സ്വത്തിനും സംരക്ഷണം ഉറപ്പാക്കണമെന്നും സിപിഐ എം ജില്ലാ സെക്രട്ടറി എസ് സതീഷ് ആവശ്യപ്പെട്ടു. കോതമംഗലം കുട്ടമ്പുഴ കൂവപ്പാറയില്‍ കാട്ടാന കിണറ്റില്‍ വീണ സ്ഥലം സന്ദര്‍ശിക്കുകയായിരുന്നു എസ് സതീഷ്. പ്രദേശത്ത് നിരന്തരം കാട്ടാനശല്യമുണ്ടാകുന്നത് ജനങ്ങളുടെ സൈ്വര്യജീവിതത്തിന് തടസ്സം സൃഷ്ടിക്കുന്നു. ആളുകള്‍ കൊല്ലപ്പെടുന്ന സ്ഥിതിയുണ്ട്. കുട്ടമ്പുഴ കൂവപ്പാറയില്‍ ഒന്പത് കോല്‍ ആഴമുള്ള കിണറ്റിലാണ് ആന വീണത്.
തുമ്പിക്കൈയിലും മസ്തിഷ്‌കത്തിലും ഗുരുതര പരിക്കേറ്റ ആനയെ മയക്കുവെടിവച്ച് ചികിത്സിക്കേണ്ടതുണ്ട്. എന്നാല്‍, കാട്ടിലേക്ക് തിരികെവിട്ട് നിരീക്ഷിച്ച് ചികിത്സ നല്‍കാനാണ് തീരുമാനം. കൃത്യമായ ചികിത്സ നല്‍കിയില്ലെങ്കില്‍ ആന വീണ്ടും ജനവാസമേഖലയിലിറങ്ങാന്‍ സാധ്യതയുണ്ട്.കിണറിന്റെ ഉടമസ്ഥന് നഷ്ടപരിഹാരം ഉടന്‍ നല്‍കണം. ഒരാഴ്ചക്കുള്ളില്‍ സൗരവേലി ഇടുമെന്ന് എംഎല്‍എ ഉറപ്പുനല്‍കിയിട്ടുണ്ട്.
അത് കൃത്യമായി നടപ്പാക്കണം. മുന്‍പ് ആനയുടെ ആക്രമണത്തില്‍ മരിച്ച പൊങ്ങിന്‍ചുവട് ഉന്നതിയിലെ ആദിവാസി കുടുംബത്തിന് നല്‍കാനുള്ള മുഴുവന്‍ തുകയും ഇതുവരെ സര്‍ക്കാര്‍ നല്‍കിയിട്ടില്ല. 14 ലക്ഷം രൂപ നല്‍കേണ്ടിടത്ത് അഞ്ചുലക്ഷം മാത്രമാണ് നല്‍കിയത്.പല തടസ്സങ്ങളും പറഞ്ഞ് സര്‍ക്കാര്‍ പാവപ്പെട്ട ആദിവാസി കുടുംബങ്ങളെയും ജനങ്ങളെയും വഞ്ചിക്കുകയാണ്. വന്യമൃഗങ്ങള്‍ കൃഷിയിടങ്ങള്‍ നശിപ്പിക്കുന്നത് തുടര്‍ന്നിട്ടും സര്‍ക്കാര്‍ പരിഹാരനടപടികളെടുക്കാത്തത് പ്രതിഷേധാര്‍ഹമാണെന്നും എസ് സതീഷ് പറഞ്ഞു.
