കോതമംഗലം: കോതമംഗലം നിയോജകമണ്ഡലത്തിൽ പൊതുമരാമത്ത് വകുപ്പിന് കീഴിലുള്ള വിവിധ പദ്ധതികളുടെ നിർമാണ പ്രവർത്തനങ്ങൾ സമയബന്ധിതമായി പൂർത്തിയാക്കാൻ തീരുമാനം. ഷിബു തെക്കുംപുറം എംഎൽഎയുടെ അധ്യക്ഷതയിൽ ചേർന്ന പൊതുമരാമത്ത് ഉദ്യോഗസ്ഥരുടെ അവലോകനയോഗത്തിലാണ് തീരുമാനം.തങ്കളം–കോഴിപ്പിള്ളി ന്യു ബൈപ്പാസ് റോഡ് സെപ്റ്റംബറിൽ ഗതാഗതയോഗ്യമാക്കും. നിർമാണ പുരോഗതി യോഗം വിലയിരുത്തി. ശേഷിക്കുന്ന പ്രവൃത്തികൾ വേഗത്തിൽ പൂർത്തിയാക്കാൻ ഉദ്യോഗസ്ഥർക്ക് നിർദേശം നൽകി.
വിവിധ സ്കൂൾ കെട്ടിടങ്ങളുടെ നിർമാണം ഡിസംബർ 31നകം പൂർത്തിയാക്കാൻ നിർദേശം നൽകി. ബജറ്റിൽ തുക വകയിരുത്തിയിട്ടുള്ള പ്രവൃത്തികൾക്ക് അടിയന്തരമായി ഭരണാനുമതി ലഭ്യമാക്കി ടെൻഡർ നടപടികൾ പൂർത്തിയാക്കി നിർമാണം ആരംഭിക്കാനും തീരുമാനിച്ചു.
ബ്ലാവന പാലത്തിന്റെ നിർമാണ നടപടികൾ വേഗത്തിലാക്കും. ഇതിനായി ജില്ലാ കലക്ടറുടെ സാന്നിധ്യത്തിൽ വനംവകുപ്പ് പൊതുമരാമത്ത് വകുപ്പ് ഉദ്യോഗസ്ഥരുടെ യോഗം വിളിക്കും. സോയിൽ ഇൻവെസ്റ്റിഗേഷൻ റിപ്പോർട്ടിന്റെ അടിസ്ഥാനത്തിൽ പാലത്തിന്റെ ഡിസൈനും എസ്റ്റിമേറ്റും തയ്യാറാക്കാനും തീരുമാനമായി.
പത്ത് വർഷമായി നിർമ്മാണം മുടങ്ങിക്കിടന്നചേലാട് അന്താരാഷ്ട്ര സ്റ്റേഡിയത്തിന്റെ പുതിയ ബിപിആർ തയ്യാറാക്കി അഡ്മിനിസ്ട്രേറ്റീവ് അനുമതിക്ക് വേണ്ടി ചീഫ് എഞ്ചിനീയർ സ്പോർട്സ് ആൻ്റ് യൂത്ത് അഫയേർസ് ഡയറക്ടർക്ക് നൽകിയിട്ടുണ്ട്
പദ്ധതികളുടെ പുരോഗതി കൃത്യമായി നിരീക്ഷിച്ച് സമയബന്ധിതമായി പൂർത്തിയാക്കാനും യോഗത്തിൽ നിർദേശം നൽകി. എംഎൽഎ ഓഫീസിൽ ചേർന്ന യോഗത്തിൽ പൊതുമരാമത്ത് വകുപ്പ് ഉൾപ്പെടെ വിവിധ വകുപ്പുകളിലെ ഉദ്യോഗസ്ഥർ പങ്കെടുത്തു.
