കോതമംഗലം: മെയ് 5ലെ പന്തൽ കാത്തിരിക്കൂ… സത്യപ്രതിജ്ഞ യുഡിഎഫിൻ്റേതെന്ന് കേരള കോൺഗ്രസ് എക്സിക്യൂട്ടീവ് ചെയർമാൻ മോൻസ് ജോസഫ്.സംസ്ഥാന രാഷ്ട്രീയത്തിൽ ആത്മവിശ്വാസം നിറച്ച് മുഖ്യമന്ത്രിയുടെ പ്രസ്താവനകൾക്ക് മറുപടിയായാണ് മോൻസ് ഇക്കാര്യം പറഞ്ഞത്.
കേരള കോൺഗ്രസ് (എം)വിട്ട് എത്തിയ ജില്ലാ, നിയോജകമണ്ഡലം നേതാക്കൾക്ക് കോതമംഗലം ലയൺസ് ക്ലബ് ഹാളിൽ നൽകിയ സ്വീകരണ സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു മോൻസ്. രാഷ്ട്രീയ മാറ്റത്തിനായുള്ള ജനവികാരം ശക്തമാണെന്നും, അത് തിരഞ്ഞെടുപ്പിൽ പ്രതിഫലിച്ചുവെന്നും പറഞ്ഞു.
പ്രതിപക്ഷ നേതാവ് വി ഡി സതീശൻ പ്രഖ്യാപിച്ച പോലെ നൂറിൽ അധികം സീറ്റുകൾ നേടി യുഡിഎഫ് വൻ വിജയം നേടുമെന്ന ആത്മവിശ്വാസവും അദ്ദേഹം പ്രകടിപ്പിച്ചു. കോതമംഗലം ഉൾപ്പെടെ 8 മണ്ഡലങ്ങളിൽ കേരള കോൺഗ്രസ് സ്ഥാനാർത്ഥികൾ വൻ ഭൂരിപക്ഷത്തോടെ വിജയിക്കുമെന്നും മോൻസ് കൂട്ടിച്ചേർത്തു.
നിയോജമണ്ഡലം പ്രസിഡന്റ് എ. ടി പൗലോസ് അധ്യക്ഷനായി. ജില്ലാ പ്രസിഡന്റ് ഷിബു തെക്കുംപുറം മുഖ്യപ്രഭാഷണം നടത്തി. സംസ്ഥാന നേതാക്കളായ ജോമി തെക്കേക്കര, റോയി സ്കറിയ, സി.കെ സത്യൻ, ബാബു പോൾ, റാണിക്കുട്ടി ജോർജ്ജ്, ജോർജ്ജ് അമ്പാട്ട്, ആന്റണി ഓലിയപ്പുറം, ബിജു വെട്ടിക്കുഴ, ജോജി സ്കറിയ, ടോമി ജോസഫ്, എൻ. സി ചെറിയാൻ, കെ.എം എൽദോസ്, കെ.എം ആന്റണി, കെ.കെ കോയാൻ, സജി തെക്കേക്കര, ജെയിംസ് കോറമ്പേൽ, ജോണി പുളിന്തടം, ലിസ്സി പോൾ, അഡ്വ. ജോസഫ് കിരൺ, എൽദോസ് വർഗീസ്, മാമച്ചാൻ സ്കറിയ, ജോസ് കവളമാക്കൻ, ഷാജി അമ്പാട്ടുകുടി, ആശ വർഗീസ്, ബിനോയ് ജോസഫ് എന്നിവർ പ്രസംഗിച്ചു.
