കോതമംഗലം: അറിവും മൂല്യബോധവും ഒരുപോലെ വളർത്തിയെടുക്കുന്ന തലമുറയാണ് നാടിന്റെ ശക്തിയെന്ന് ഉന്നത വിദ്യാഭ്യാസ വകുപ്പ് മന്ത്രി റോജി എം. ജോൺ.എസ്എസ്എൽസി, ഹയർ സെക്കൻഡറി പരീക്ഷകളിൽ ഫുൾ എ പ്ലസ് നേടിയ വിദ്യാർത്ഥികളെയും വിവിധ സർവകലാശാലകളിലെ റാങ്ക് ജേതാക്കളെയും ആദരിക്കുന്ന വിദ്യാ എംഎൽഎ എജുക്കേഷൻ എക്സലൻസ് അവാർഡ് ധാന ചടങ്ങ് കോതമംഗലം കലാ ഓഡിറ്റോറിയത്തിൽ ഉദ്ഘാടനം ചെയ്യുകയായിരുന്നു മന്ത്രി.
കഠിനാധ്വാനവും ആത്മവിശ്വാസവുമാണ് വിജയത്തിന്റെ അടിത്തറയെന്നും, വിദ്യാർത്ഥികൾ സ്വന്തം കഴിവുകൾ തിരിച്ചറിഞ്ഞ് ഉയർന്ന ലക്ഷ്യങ്ങളിലേക്ക് മുന്നേറണമെന്നും മന്ത്രി പറഞ്ഞു. ഷിബു തെക്കുംപുറം എംഎൽഎ അധ്യക്ഷത വഹിച്ചു. ഡീൻ കുര്യാക്കോസ് എംപി മുഖ്യപ്രഭാഷണം നടത്തി.
സെലിബ്രിറ്റി ഗസ്റ്റ് സിനിമാതാരം മഞ്ജു വാര്യർ ജീവിതത്തിൽ മറ്റുള്ളവരുടെ ഇഷ്ടത്തിനല്ല, സ്വന്തം അഭിരുചിക്കും കഴിവിനും അനുസരിച്ച് പഠന-തൊഴിൽ മേഖല തിരഞ്ഞെടുക്കണമെന്നും, അതാണ് യഥാർഥ വിജയത്തിലേക്കും സന്തോഷത്തിലേക്കും നയിക്കുന്നതെന്നും പറഞ്ഞു.
എറണാകുളം ജില്ലാ കളക്ടർ ജി. പ്രിയങ്ക , മുനിസിപ്പൽ ചെയർപേഴ്സൺ ഭാനുമതി രാജു, ബ്ലോക്ക് പഞ്ചായത്ത് പ്രസിഡന്റ് ജെസ്സി സാജു, വിവിധ പഞ്ചായത്ത് പ്രസിഡന്റുമാർ, ത്രിതല പഞ്ചായത്ത് ജനപ്രതിനിധികൾ, വിദ്യാഭ്യാസ-സാമൂഹിക- രാഷ്ട്രീയ രംഗത്തെ പ്രമുഖർ, വിദ്യാർത്ഥികൾ, രക്ഷിതാക്കൾ എന്നിവർ ചടങ്ങിൽ പങ്കെടുത്തു.
ചടങ്ങിൽ ഫുൾ എ പ്ലസ് ജേതാക്കളെയും സർവകലാശാല റാങ്ക് ജേതാക്കളെയും ഉപഹാരങ്ങളും മൊമെന്റോകളും നൽകി ആദരിച്ചു.
