കോതമംഗലം: വിസ്മയ കാഴ്ചകളുടെ കെട്ടുകൾ അഴിച്ച് സഞ്ചാരികളുടെ പറുദീസയായി ഭൂതത്താൻകെട്ട്. എറണാകുളം ജില്ലയിലെ പ്രധാന ടൂറിസ്റ്റ് കേന്ദ്രമായ ഭൂതത്താൻകെട്ടിൽ വീണ്ടും സഞ്ചാരികളുടെ വൻ തിരക്ക്. കോവിഡ്ക്കാല ലോക്ക് ഡൌൺ കഴിഞ്ഞു വിനോദ സഞ്ചാര മേഖല തുറന്നതോടെ ഭൂതത്താൻകെട്ട് ഉണർന്നു. ഇവിടുത്തെ പ്രധാന ആകർഷണം പെരിയാറിന്റെ മടിത്തട്ടിലുടെ ഉള്ള ബോട്ടിംഗ് ആണ്. പെരിയാർ നദിയുടെ ഇരുവശവുമുള്ള കാനന ഭംഗി ആസ്വദിച്ചു, കുളിർമയുള്ള നനുത്ത കാറ്റിലും, ബോട്ടിൽ ഉള്ള മധുരമുള്ള സംഗീതത്തിലും ഒക്കെ ലയിച്ചു മതിമറന്നു ഉല്ലസിക്കാൻ ഇതിലും പറ്റിയ ഒരിടം വേറെ ഇല്ല. ഭൂതത്താന്കെട്ടിൽ വന്നാൽ തടാകത്തിലുടെ വിനോദ സഞ്ചാരികൾക്ക് പെഡൽ ബോട്ടിലും ചുറ്റിയടിക്കാം. കാടിന്റെ വന്യസൗന്ദര്യം നുകർന്നുകൊണ്ട് ബോട്ടിലിരുന്ന് ചൂണ്ടയിട്ട് മീൻ പിടിക്കാം.
വർഷംതോറും വിദേശികളടക്കം രണ്ടു ലക്ഷത്തിലധികം സഞ്ചാരികൾ എത്തുന്ന ഭൂതത്താൻകെട്ടിൽ കോവിഡ് ലോക് ഡൌൺ കഴിഞ്ഞ് ഒരു ഇടവേളയ്ക്കുശേഷമാണ് ബോട്ടിങ് പുനരാരംഭിച്ചത് . തട്ടേക്കാട് ദുരന്തത്തിനുശേഷം നിർത്തിവച്ചിരുന്ന ബോട്ടിങ് ഇടയ്ക്ക് വീണ്ടും ആരംഭിച്ചെങ്കിലും വൈകാതെ നിർത്തിയിരുന്നു. ഇപ്പോൾ എല്ലാ സുരക്ഷാ സംവിധാനങ്ങളും ഒരുക്കിയാണ് പെഡൽ ബോട്ടുകളുടെയും, വലിയ ബോട്ട്കളുടെയും ഒക്കെ തിരിച്ചു വരവ്. ഇടത്തോടുകൾ നിർമിച്ച് പെഡൽ ബോട്ടുവഴി കുട്ടികൾക്കടക്കം പൂളിലേക്ക് എത്തിച്ചേരുന്നതിനുള്ള സൗകര്യവും ഒരുക്കിയിട്ടുണ്ട്.സഞ്ചാരികളെ ആകർഷിക്കാൻ
ഏറുമാടങ്ങളും, ഭൂതത്താന്കെട്ടിന്റെ വന്യ സൗന്ദര്യം ആസ്വദിക്കുന്നതിനായി വാച്ച് ടവറും നിർമിച്ചിട്ടുണ്ട്.ആടിയും, പാടിയും പെരിയാറിന്റെ മടിത്തട്ടിലുടെ കാടിനെ അറിഞ്ഞുള്ള ബോട്ട് യാത്രക്കായി കേരളത്തിലെ വിവിധ ജില്ലകളിൽ നിന്ന് സഞ്ചാരികളുടെ ഒഴുക്കാണ് ഭൂതത്താന്കെട്ടിലേക്ക്. തന്മുലം പ്രധാന റോഡിൽ വാഹനകുരുക്കും രൂപപെടുന്നുണ്ട്.
More Details pls contact : +91 99466 41324
