കോതമംഗലം: നിര്ദ്ദിഷ്ട ഫിലിം സിറ്റി സ്ഥാപിക്കാന് വിനോദ സഞ്ചാര കേന്ദ്രമായ ഭൂതത്താന്കെട്ടിനെ പരിഗണിക്കണമെന്ന ആവശ്യം ശക്തം. സംസ്ഥാന ബഡ്ജറ്റിലാണ് ഫിലിം സിറ്റി എറണാകുളത്ത് സ്ഥാപിക്കുന്നതിനുള്ള തീരുമാനം പ്രഖ്യാപിച്ചത്. ഇതിന് കൃത്യമായ സ്ഥലം നിശ്ചയിച്ചിട്ടില്ലെന്നാണ് സൂചന. ഈ സാഹചര്യത്തിലാണ് ഭൂതത്താന്കെട്ടിന്റെ സാധ്യത ഉയര്ത്തികൊണ്ടുവരുന്നത്. ഫിലിംസിറ്റിക്ക് അനുയോജ്യമായ ഒട്ടേറെ ഘടകങ്ങള് ഭൂതത്താന്കെട്ടിലും പരിസരങ്ങളിലുമായുണ്ട്.
പെരിയാറും തടാകങ്ങളും മലകളും പ്ലാന്റേഷനും നിബിഢ വനവും പുല്മേടും താഴ്വാരങ്ങളും പാറക്കെട്ടുകളും വെള്ളച്ചാട്ടങ്ങളും അടക്കം പ്രകൃതിയുടെ വിവിധ ഭാവങ്ങള് സിനിമകള്ക്കായി ഒപ്പിയെടുക്കാന് സാധിക്കും. ഇടമലയാര്,വടാട്ടുപാറ, തട്ടേക്കാട്, നേര്യമംഗലം, കുട്ടമ്പുഴ, പൂയംകുട്ടി, ഇഞ്ചത്തൊട്ടി, മാമലകണ്ടം തുടങ്ങി സിനിമകള്ക്ക് ലൊക്കേഷനുകളാക്കാവുന്ന പ്രദേശങ്ങളാണ് ചുറ്റുപാടുമുള്ളത്. ഫിലിം സിറ്റിക്കാവശ്യമായ അടിസ്ഥാന സൗകര്യങ്ങള്ക്കായി സ്ഥല ലഭ്യതയും ഉറപ്പാക്കാന് കഴിയും.
ജലവിഭവ വകുപ്പിന്റെ ഏക്കര്കണക്കിന് ഭൂമി ഫിലിം സിറ്റിക്കായി ഉപയോഗപ്പെടുത്താന് കഴിയും. ജലവിഭവവകുപ്പിന്റെ അധീനതയിലുള്ള സ്ഥലവും കെട്ടിടങ്ങളുള്പ്പടെയുള്ള മറ്റ് സൗകര്യങ്ങളും ടൂറിസം പദ്ധതിക്കായി സ്വകാര്യ കമ്പനിക്ക് പാട്ടത്തിന് നല്കാന് തീരുമാനം എടുത്തിരുന്നു. ഈ സാഹചര്യത്തില് ഫിലിം സിറ്റിക്ക് ഭൂമി കൈമാറുന്നതില് സാങ്കേതിക-നിയമ തടസങ്ങളുണ്ടാകാനുമിടയില്ല. വ്യവസായ വകുപ്പിന്റെ കീഴിലും ഇവിടെ സ്ഥലമുണ്ട്. ഏറ്റെടുക്കാന്കഴിയുന്ന സ്വകാര്യഭൂമിയും ധാരാളമുണ്ട്.
ഭൂതത്താന്കെട്ടിലും ചുറ്റുമുള്ള പ്രദേശങ്ങളിലുമായി ഒട്ടേറെ സിനിമകള്ക്ക് ലൊക്കേഷന് ഒരുക്കിയിട്ടുണ്ട്. നസീര് – ജയന് കാലഘട്ടംമുതല് ഇപ്പോഴത്തെ സൂപ്പര് സ്റ്റാറുകളും യുവതാരങ്ങളുംവരെ അഭിനയിച്ച ഹിറ്റ് ചിത്രങ്ങളും ഇക്കൂട്ടത്തില് നിരവധിയാണ്. ഫിലിം സിറ്റിക്കായി ഭൂതത്താന്കെട്ടിനെ പരിഗണിക്കുന്നതിനോട് സിനിമാ മേഖലയ്ക്കും എതിര്പ്പുണ്ടാകാന് ഇടയില്ലെന്നാണ് വിലയിരുത്തല്.
