കോതമംഗലം: ഓണാഘോഷത്തിന്റെ ഭാഗമായി വര്‍ണാഭമായ ദീപാലങ്കാരങ്ങളാല്‍ അണിഞ്ഞൊരുങ്ങിയ ഭൂതത്താന്‍കെട്ട് ഡാമും പരിസരവും സന്ദര്‍ശകരുടെ പ്രധാന ആകര്‍ഷണമായി. കോതമംഗലത്ത് പൊളിഓണം പരിപാടികള്‍ക്ക് ഞായറാഴ്ച സമാപനമാകും.
പ്രകൃതിഭംഗിയുടെ മാറ്റുകൂട്ടാന്‍ പശ്ചാത്തലമൊരുക്കിയ ദീപക്കാഴ്ചകള്‍ കാണാന്‍ ദിവസവും നിരവധി പേരാണ് ഭൂതത്താന്‍കെട്ടില്‍ എത്തുന്നത്.
ഭൂതത്താന്‍കെട്ടിലെ വാച്ച്ടവര്‍ തുറന്നതോടെ സന്ദര്‍ശനം കൂടുതല്‍ സജീവമായി. വാച്ച്ടവറില്‍നിന്നുള്ള ദൂര കാഴ്ചകള്‍ ആസ്വദിക്കാനും ദീപാലങ്കാരങ്ങളുടെ മനോഹരമായ കാഴ്ച കാണാനും ഓണാവധിക്ക് കുടുംബങ്ങളുടെയും കുട്ടികളുടെയും യുവാക്കളുടെയും സാന്നിധ്യം ശ്രദ്ധേയമായിരുന്നു.
ഓണനിലാവ് പരിപാടികളുടെ ഭാഗമായി മാര്‍ ബേസില്‍ കണ്‍വെന്‍ഷന്‍ സെന്ററില്‍ നടത്തിയ മണ്ണാളര്‍ ജനകീയ നാട്ടീണങ്ങള്‍ – തുടി മ്യൂസിക്കല്‍ ഫോക്ക് ബാന്റ് രാഹുല്‍ കൊച്ചാപ്പിയും സംഘവും അവതരിപ്പിച്ച നാടന്‍പാട്ടിന്റെയും സംഗീതത്തിന്റെയും താളമേളങ്ങളാല്‍ ഓണാഘോഷത്തിന് ആവേശം പകര്‍ന്നു. കോതമംഗലത്ത് ഓണാഘോഷങ്ങളുടെ സമാപന സമ്മേളനം ഞായറാഴ്ച വൈകിട്ട് നാലിന് കായിക യുവജനകാര്യ വകുപ്പ് മന്ത്രി ഒ. ജെ. ജനീഷ് ഉദ്ഘാടനം ചെയ്യും. ഷിബു തെക്കുംപുറം എംഎല്‍എ അധ്യക്ഷത വഹിക്കും.
തുടര്‍ന്ന് ജെന്‍സി ഡിജെ നൈറ്റ് മ്യൂസിക് ഷോ അരങ്ങേറും.
