കുട്ടമ്പുഴ : മേയാൻ വിട്ടിരുന്ന പശുവിനെ തേടിപ്പോയ വീട്ടമ്മ കാട്ടാനയുടെ ആകമണത്തിൽ കൊല്ലപ്പെട്ടു. എളംബ്ലാശ്ശേരി ചപ്പാത്ത് ഭാഗത്ത് കാട്ടാന സ്ത്രീയെ ചവിട്ടിക്കൊന്നു. വാഴയിൽ കൃഷ്ണൻകുട്ടി എന്നയാളുടെ ഭാര്യ നളിനി (52) യെ ആണ് കാട്ടാന ചവിട്ടിക്കൊന്നത്. ഉച്ചക്ക് ഒരു മണിയോടെയാണ് സംഭവം. പശുവിനെ വനാതിർത്തിയോട് ചേർന്നുള്ള കൃഷിസ്ഥലത്ത് മേയാൻ വിട്ടിരുന്നു. പശുവിനെ അഴിക്കാൻ ചെന്ന സമയത്താണ് ആക്രമണം ഉണ്ടായത്.
പശുവിനെ അഴിക്കാൻ പോയ നളിനി സമയം കഴിഞ്ഞിട്ടും തിരികെ വരാത്തതിനെ തുടർന്ന് വീട്ടുകാർ നടത്തിയ തിരച്ചിലിലാണ് നളിനിയെ ആന ചവിട്ടിക്കൊന്നിട്ടിരിക്കുന്ന കാഴ്ച കണ്ടത്. നേര്യമംഗലം ഫോറസ്റ്റ് റേഞ്ചിൽപ്പെട്ട ചപ്പാത്ത് വന അതിർത്തിയിലാണ് അപകടം. പോലീസ് ,വനം വകുപ്പുകളുടെ നിയമ നടപടികൾ കഴിഞ്ഞ് മൃതദേഹം പോസ്റ്റ്മോർട്ടത്തിനു അടിമാലി താലൂക്ക് ആശുപത്രിയിലേക്ക് നീക്കി. മക്കൾ ഷിനോ, അഞ്ചു. മരുമക്കൾ രമ്യ, പ്രതീപ്.
