കോതമംഗലം : അതിരപ്പിള്ളി പഞ്ചായത്തിലെ അരേക്കാപ്പ് പട്ടിക വർഗ കോളനിയിൽ പട്ടിക വിഭാഗ വികസനകാര്യ മന്ത്രി കെ രാധാകൃഷ്ണൻ, ജില്ലാ കലക്ടർ ഹരിത വി കുമാർ എന്നിവരുടെ നേതൃത്വത്തിലുള്ള സംഘം ഇന്നലെ (നവംബർ 12) സന്ദർശനം നടത്തി. ഇടമലയാറിൽ നിന്ന് ബോട്ട് മാർഗമാണ് ഇവർ എത്തിയത്. വെള്ളിയാഴ്ച രാവിലെ 7 മണിയോടെയാണ് ഇവർ ഇടമലയാറിൽ നിന്ന് പുറപ്പെട്ടത്. പുറം ലോകവുമായി ഒറ്റപ്പെട്ടു കിടക്കുന്ന അരേക്കാപ്പ് കോളനിയിലേക്ക് റോഡ് നിർമിക്കാൻ അടുത്തിടെ ചേർന്ന യോഗത്തിൽ തീരുമാനിച്ചിരുന്നു. ഇതിന് മുന്നോടിയായാണ് സന്ദർശനം.
ഇതിനു പുറമെ ഇവിടുത്തെ ആദിവാസികളുടെ പ്രശ്നങ്ങൾ നേരിട്ട് മനസിലാക്കുന്നതിനും, ചർച്ച ചെയ്യാനും കൂടിയാണ് മന്ത്രിയുടെ സന്ദർശനം. അതിരപ്പിള്ളി മലക്കപ്പാറയിൽ നിന്ന് 4 കിലോമീറ്റർ അകലെ ഉൾക്കാട്ടിലാണ് 45 കുടുംബങ്ങൾ താമസിച്ചു വരുന്ന അരേക്കാപ്പ്. വനാവകാശ നിയമമനുസരിച്ച് ലഭിച്ച 148 ഏക്കർ ഭൂമിയിലെ കൃഷിയും ഇടമലയാർ അണക്കെട്ടിൽ നിന്നുള്ള മത്സ്യബന്ധനവുമാണ് ഇവരുടെ ഉപജീവനമാർഗം. മലക്കപ്പാറയിൽ നിന്ന് അരേക്കാപ്പിലേക്ക് റോഡ് നിർമിക്കാൻ 20 കോടി രൂപയുടെ ചെലവ് പ്രതീക്ഷിക്കുന്നുണ്ട്. തൊഴിലുറപ്പ് പദ്ധതിയിൽപ്പെടുത്തി റോഡിന്റെ പ്രാരംഭ പണികൾ നവംബർ രണ്ടാം വാരത്തിൽ ആരംഭിക്കും.
