പോത്താനിക്കാട്: പൈങ്ങോട്ടൂര്‍ പഞ്ചായത്തില്‍ സമീപ ദിവസങ്ങളില്‍ മോഷണം പെരുകുന്നെന്ന പരാതിയുമായി നാട്ടുകാര്‍. ഞായറാഴ്ച രാത്രി പൈങ്ങോട്ടൂര്‍ വടക്കേക്കര ഷാജിയുടെ വീട്ടില്‍നിന്ന് മൂന്ന് പവന്റെ സ്വര്‍ണ മാല മോഷ്ടിച്ചതാണ് ഏറ്റവും ഒടുവിലത്തേത്. ഒരാഴ്ച മുന്‍പ് ചാത്തമറ്റം സ്‌കൂള്‍ കവലയിലുള്ള അയ്യങ്കോലില്‍ ജോസിന്റെ ഒന്നര പവന്റെ സ്വര്‍ണ മാല മോഷണം പോയിരുന്നു.
രണ്ട് മോഷണങ്ങളും രാത്രി ഒന്നിനും മൂന്നിനും ഇടയിലാണ് നടന്നത്. ഒരു മാസം മുന്‍പ് ഞാറക്കാട്ടുനിന്നും സമാന രീതിയില്‍ ഒരു പവന്റെ മാല മോഷ്ടിച്ചിരുന്നു. കഴിഞ്ഞ ദിവസം ചാത്തമറ്റം സെന്റ് പീറ്റേഴ്സ് ആന്‍ഡ് സെന്റ് പോള്‍സ് പള്ളിയുടെ ഭണ്ഡാരം കുത്തിത്തുറന്ന് കവര്‍ച്ച നടന്നിട്ടുണ്ട്. ഇന്നലെ പോത്താനിക്കാട് പോലീസും വിരലടയാള വിദഗ്ധരും വടക്കേക്കര ഷാജിയുടെ വീട്ടിലെത്തി പരിശോധന നടത്തി.
