കോതമംഗലം: ഓര്മ്മകള്ക്ക് നിറം പകര്ന്ന് എംഎ കോളേജ് പൂര്വ വിദ്യാര്ത്ഥികള് അമേരിക്കയില് ഒത്തുകൂടി. കോതമംഗലം മാര് അത്തനേഷ്യസ് കോളേജില് നിന്ന് വിവിധ കാലഘട്ടങ്ങളില് പഠിച്ചിറങ്ങി, അമേരിക്കയിലെ വിവിധയിടങ്ങളില് താമസിക്കുന്ന പൂര്വ വിദ്യാര്ത്ഥികളുടെ കുടുംബ സംഗമം ഫിലാഡല്ഫിയയില് നടന്നു.മൂന്ന് ദിവസങ്ങളിലായി നടന്ന സംഗമം എംഎ കോളേജ് പ്രിന്സിപ്പല് ഡോ. മഞ്ജു കുര്യന് ഉദ്ഘാടനം ചെയ്തു. പൂര്വ വിദ്യാര്ത്ഥി സംഘടനയുടെ അമേരിക്കന് ചാപ്റ്റര് പ്രസിഡന്റ് സാബു സ്കറിയ അധ്യക്ഷത വഹിച്ചു.
24 ന്യൂസ് അസോസിയേറ്റ് എക്സിക്യൂട്ടീവ് എഡിറ്റര് വി അരവിന്ദ്, അമേരിക്കയിലെ പേപ്പര് കമ്പനിയായ മേരിലാന്ഡ്ന്റെ പ്രസിഡന്റും, സിഇഒയുമായ മാത്യു ചക്കോള, എന്നിവര് മുഖ്യപ്രഭാഷണം നടത്തി.അനു ഡെനില്, മീന തമ്പി, സച്ചി സാബു, ജോസഫ് കുര്യപ്പുറം, സാജു പൗലോസ്, വിന്സെന്റ് ഇമ്മനുവല് എന്നിവര് പ്രസംഗിച്ചു.വര്ഷങ്ങള്ക്ക് ശേഷം പഴയ ക്ലാസ് മുറികളിലെ ഓര്മ്മകള് പങ്കുവെക്കാനും, അധ്യാപകരെ ഓര്ക്കാനും, കോളേജ് ജീവിതത്തിലെ രസകരമായ അനുഭവങ്ങള് പറഞ്ഞ് ചിരിക്കാനും സംഗമം അവസരമായി.
സഹപാഠികളെയും സമകാലികരെയും കണ്ടുമുട്ടി, ജീവിതാനുഭവങ്ങള് പങ്കിടുന്നതിന് ലഭിച്ച സംഗമത്തിലേക്ക് അമേരിക്കയുടെ വിവിധ ഭാഗങ്ങളില് നിന്ന് നൂറിലേറെ പൂര്വ വിദ്യാര്ത്ഥികള് എത്തി. നൃത്തവും പാട്ടും ഡിജെ നൈറ്റും വയലിന് സംഗീതവും എല്ലാമായി മൂന്ന് ദിവസങ്ങള് ആഘോഷപൂര്ണ്ണമായിരുന്നു. ജനറല് സെക്രട്ടറി ജോബി മാത്യു, ട്രഷറര് ജോര്ജ് വര്ഗീസ് മാലിയില്, വൈസ് പ്രസിഡന്റ് ജെയ്ബി റോയ് എന്നിവര് പരിപാടികള്ക്ക് നേതൃത്വം നല്കി.



















































