കോതമംഗലം: കുട്ടമ്പുഴക്കു സമീപം പെരിയാർ നദിയിൽ കാട്ടാനക്കൂട്ടം സ്ഥിരമായി എത്തുന്നത് പ്രേദേശവാസികൾക്ക് കണ്ണിന് കൗതുക കാഴ്ചയാണ്. ചിലപ്പോൾ കാട്ടാനകൾ കുട്ടികളുമൊത്ത് ആണ് പെരിയാറിൽ നീരാടി തിമിർക്കുന്നത് . ആന കുളി കാണുവാൻ പ്രദേശ വാസികൾക്ക് പുറമെ കോതമംഗലം താലൂക്കിലെ വിവിധ പ്രദേശങ്ങളിൽ നിന്നു കുടുംബസമ്മേതമാണ് ആളുകൾ വരുന്നത്. പുഴയിലിറങ്ങിയ ആനക്കൂട്ടം വെള്ളത്തിൽ മതിവരുവോളം കളിച്ചും നീന്തിയും മണിക്കൂറുകളോളം സമയം ചിലവിടുന്നതിനാൽ ആ കാഴ്ച കാണുന്നത് തന്നെ ആനന്തകരമാണ്.
കുട്ടമ്പുഴ സത്രപ്പടി പ്രദേശങ്ങളിലാണ് കരീവിരൻമാരുടെ ഈ നിരാട്ട്. കോവിഡ് 19 നിയന്ത്രണങ്ങളിൽ ഇളവ് വന്നതോടെ നിരവധി പേർ പെരിയാറിൽ എത്തി നീരാടുന്ന കാട്ടാനക്കൂട്ടത്തെ കാണുവാൻ എത്തുന്നുണ്ട്. ഒരുകാലത്ത് കാട്ടാനകളുടെ നീരാട്ട് കാണുവാൻ മാങ്കുളം ആനകുളത്ത് പോയിരുന്ന ആന പ്രേമികൾക്ക് ഇപ്പോൾ കുട്ടമ്പുഴയും നയന മനോഹര കാഴ്ചകൾ സമ്മാനിക്കുകയാണ്.
