കോതമംഗലം: ടൗണിലെ തങ്കളം ജംഗ്ഷനിലെ വെള്ളക്കെട്ടിന് ശാശ്വത പരിഹാരം കാണണമെന്ന് യുഡിഎഫ് ജില്ലാ കൺവീനർ ഷിബു തെക്കുംപുറം ആവശ്യപ്പെട്ടു. മുട്ടൊപ്പം വെള്ളം കയറിയ റോഡിലൂടെ വാഹനങ്ങൾ കടന്നു പോകുമ്പോൾ പരിസരത്തെ കടകളിലേക്ക് മലിനജലം ഇരച്ചുകയറുകയാണ്. വെള്ളത്തിലൂടെ കടന്നുപോകുന്ന വാഹനങ്ങൾ പാതിവഴിയിൽ നിന്നു പോകുകയാണ്. ഇരുചക്ര വാഹന യാത്രികരാണ് ഏറെ ദുരിതം അനുഭവിക്കുന്നത്.
വെള്ളം ഒഴുകി പോകാൻ കഴിയുന്ന വീതി കൂടിയ കാനകൾ നിർമിച്ച് റോഡ് പുനർനിർമിക്കണം. നഗരസഭയും എംഎൽഎയും ഇനിയും അനങ്ങാപാറ നയം സ്വീകരിച്ചാൽ ജനങ്ങൾക്ക് ഒപ്പം നിന്നു ശക്തമായ സമരം നടത്തുമെന്ന് അദ്ദേഹം പറഞ്ഞു.
