മൂവാറ്റുപുഴ : കാൽനൂറ്റാണ്ടിന്റെ സാങ്കേതിക മികവിന്റെയും അക്കാദമിക മുന്നേറ്റങ്ങളുടെയും നിറവിൽ വാഴക്കുളം വിശ്വജ്യോതി എൻജിനീയറിംഗ് കോളേജിന്റെ രജതജൂബിലി ആഘോഷങ്ങൾക്ക് സമാപനം. രജതജൂബിലി സമാപന സമ്മേളനം മുഖ്യമന്ത്രി വി.ഡി. സതീശൻ ഉദ്ഘാടനം ചെയ്തു.
സാങ്കേതിക വിദ്യാഭ്യാസം കാലത്തിന്റെ മാറ്റങ്ങൾക്കനുസരിച്ച് നിരന്തരം നവീകരിക്കപ്പെടണമെന്നും ഇന്നൊവേഷനും ഗവേഷണവും സംരംഭകത്വവും വിദ്യാഭ്യാസത്തിന്റെ മുഖ്യധാരയിലേക്ക് കൊണ്ടുവരുന്നതിലൂടെ യുവതലമുറയുടെ അറിവിനെയും കഴിവുകളെയും നൂതന ആശയങ്ങളായും സംരംഭങ്ങളായും തൊഴിൽസാധ്യതകളായും രൂപപ്പെടുത്തുന്ന വിദ്യാഭ്യാസ സമീപനമാണ് കാലം ആവശ്യപ്പെടുന്നതെന്നും അദ്ദേഹം പറഞ്ഞു.
വാഴക്കുളം വിശ്വജ്യോതി എൻജിനീയറിങ്എൻജിനീയറിംഗ് കോളേജിന്റെ രജതജൂബിലി ആഘോഷങ്ങളുടെ സമാപന സമ്മേളനം കോളേജ് ഓഡിറ്റോറിയത്തിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. യുവജനങ്ങൾക്കായി വലിയ പദ്ധതികളാണ് സർക്കാർ ആവിഷ്കരിച്ച് നടപ്പാക്കുന്നതെന്നും വരുംതലമുറകളുടെ സുരക്ഷിതമായ ഭാവി ഉറപ്പാക്കുക എന്നത് സർക്കാരിന്റെ പ്രധാന ദൗത്യങ്ങളിലൊന്നാണെന്നും മുഖ്യമന്ത്രി പറഞ്ഞു. ആർട്ടിഫിഷ്യൽ ഇന്റലിജൻസ് ഉൾപ്പെടെയുള്ള അതിവേഗം മാറുന്ന സാങ്കേതികവിദ്യകൾ വിദ്യാഭ്യാസത്തിന്റെയും തൊഴിൽമേഖലയുടെയും സ്വഭാവം മാറ്റുന്ന കാലത്ത്, കേവലം തൊഴിൽ നേടാനുള്ള ഉപാധിയെന്നതിനപ്പുറം സാങ്കേതിക വിദ്യാഭ്യാസം ഗവേഷണത്തിന്റെയും സംരംഭകത്വത്തിന്റെയും വളർച്ചയ്ക്ക് വഴിയൊരുക്കുന്ന പ്രധാന ശക്തിയായി മാറണമെന്നും അദ്ദേഹം സൂചിപ്പിച്ചു.
ചടങ്ങിൽ കോതമംഗലം രൂപത മെത്രാൻ മാർ ജോർജ് മഠത്തിക്കണ്ടത്തിൽ അധ്യക്ഷത വഹിച്ചു. മാർ ജോർജ് പുന്നക്കോട്ടിൽ അനുഗ്രഹപ്രഭാഷണവും നടത്തി. കോളേജിന്റെ കാൽനൂറ്റാണ്ട് നീണ്ട യാത്രയിലെ പ്രധാന നാഴികക്കല്ലുകളും ഓർമകളും കോർത്തിണക്കിയ രജതജൂബിലി സുവനീർ മുൻ വിദ്യാഭ്യാസ മന്ത്രി പി.ജെ. ജോസഫ് പ്രകാശനം ചെയ്തു.
ചടങ്ങിൽ കോളേജിന്റെ സ്ഥാപക മാനേജർ ഫാ. തോമസ് മലേക്കുടി അച്ചനെ മുഖ്യമന്ത്രി ആദരിച്ചു.
ഡിൻ കുര്യാക്കോസ് എം.പി., മാത്യു കുഴൽനാടൻ എം.എൽ.എ., അഡ്വ. കെ. ഫ്രാൻസിസ് ജോർജ് എം.പി., മുൻ എം.എൽ.എ. ജോണി നെല്ലൂർ, കോളേജ് മാനേജർ മോൺ. ഡോ. പയസ് മലേക്കണ്ടത്തിൽ, ഡയറക്ടർ റവ. ഡോ. പോൾ പാറത്താഴം, പ്രിൻസിപ്പൽ ഡോ. നവീൻ ജേക്കബ്, ആവോലി ഗ്രാമപഞ്ചായത്ത് പ്രസിഡന്റ് ജോജി കുറുപ്പാമഠം, വാർഡ് മെമ്പർ രമ്യ ലിയോ, ട്രഷറർ ഡോ.കെ വി തോമസ് , വൈസ് പ്രസിഡന്റ് മാത്യു കൊച്ചുമുട്ടം, ജോയിന്റ് സെക്രട്ടറി റവ. ഫാ. ജോസ് പുല്ലോപ്പിള്ളിൽ, വി വി കുരിയൻ വള്ളമറ്റം,ജോളി ജോർജ് നെടുങ്കല്ലേൽ, സ്റ്റുഡന്റ് യൂണിയൻ പ്രതിനിധി അക്സ ജോൺ തുടങ്ങിയവർ പ്രസംഗിച്ചു.
കോളേജിന്റെ മുൻ മാനേജർമാരായ റവ.ഡോ. ഫ്രാൻസിസ് ആലപ്പാട്ട്, റവ ഡോ. ചെറിയാൻ കാഞ്ഞിരക്കൊമ്പിൽ, ഡയറക്ടർമാരായ റവ.ഡോ. ജോർജ് താനത്തുപറമ്പിൽ, ഫാ. പോൾ നെടുമ്പുറത്ത് എന്നിവരെയും ചടങ്ങിൽ ആദരിച്ചു.
2001-ൽ കോതമംഗലം രൂപത ടെക്നിക്കൽ എഡ്യൂക്കേഷൻ ട്രസ്റ്റിന്റെ കീഴിൽ പ്രവർത്തനം ആരംഭിച്ച വിശ്വജ്യോതി എൻജിനീയറിങ് കോളേജ്, കാൽനൂറ്റാണ്ടിനിടെ അക്കാദമിക് രംഗത്തും സാങ്കേതിക വിദ്യാഭ്യാസ മേഖലയിലും വൻ കുതിച്ചുചാട്ടമാണ് നടത്തിയത്. നിലവിൽ എട്ട് ബി.ടെക് പ്രോഗ്രാമുകൾക്ക് പുറമെ ഹോട്ടൽ മാനേജ്മെന്റ് ആൻഡ് കാറ്ററിങ് ടെക്നോളജി, എം.ബി.എ. തുടങ്ങിയ കോഴ്സുകളും കോളേജിൽ പ്രവർത്തിക്കുന്നുണ്ട്. NAAC ‘A’ ഗ്രേഡും 2025-ൽ യു.ജി.സി. 10 വർഷത്തേക്ക് സ്വയംഭരണ പദവിയും അനുവദിച്ചു. . പൂർവവിദ്യാർഥി സംഗമം, അക്കാദമിക് സെമിനാറുകൾ, സാങ്കേതിക പരിശീലനങ്ങൾ, വിദ്യാർഥികളുടെ നൂതന ആശയങ്ങൾക്കും സംരംഭകത്വത്തിനുമുള്ള പദ്ധതികൾ, സാമൂഹിക സേവന പ്രവർത്തനങ്ങൾ എന്നിവയോടെയാണ് വിശ്വജ്യോതി രജതജൂബിലി സമാപനത്തിലേക്ക് എത്തിയത്..
