മൂവാറ്റുപുഴ: മൂവാറ്റുപുഴ നഗരസഭയില്‍ കേന്ദ്ര സര്‍ക്കാര്‍ ഫണ്ടിന്റെ വീതം വെപ്പിനെ തുടര്‍ന്നുണ്ടായ തര്‍ക്കത്തിനൊടുവില്‍ ഭരണ പ്രതിപക്ഷ അംഗങ്ങള്‍ തമ്മില്‍ ഏറ്റുമുട്ടി. കേന്ദ്ര ഫണ്ടില്‍ നിന്നും തദ്ദേശസ്വയംഭരണ സ്ഥാപനങ്ങള്‍ക്ക് വികസന പ്രവര്‍ത്തനങ്ങള്‍ക്കായി അനുവദിച്ച ഫണ്ട് വിവിധ വാര്‍ഡുകള്‍ക്ക് വീതം വെക്കുന്നതിനായി ബുധനാഴ്ച നഗരസഭ അടിയന്തര കൗണ്‍സില്‍ ചേര്‍ന്നിരുന്നു. എന്നാല്‍ പ്രതിപക്ഷ കൗണ്‍സിലര്‍മാരുടെ വാര്‍ഡുകളിലേക്ക് കൃത്യമായി തുക അനുവദിച്ചില്ലെന്നാരോപിച്ച് പ്രതിപക്ഷ അംഗങ്ങള്‍ കൗണ്‍സില്‍ നിന്ന് ഇറങ്ങി പോവുകയും, നഗരസഭ ചെയര്‍പേഴ്‌സന്റെ ക്യാബിന് മുന്നില്‍ കുത്തിയിരുന്ന് സമരം നടത്തുകയുമായിരുന്നു.
മുദ്രാവാക്യ വിളികളുമായി പ്രതിപക്ഷം സമരം തുടരുന്നതിനിടെ കൗണ്‍സില്‍ യോഗം അവസാനിപ്പിച്ച് മറ്റൊരു വഴിയിലൂടെ ചെയര്‍പേഴ്‌സണും യുഡിഎഫ് കൗണ്‍സിലര്‍മാരും ചെയര്‍പേഴ്‌സന്റെ ക്യാബിനിലേക്ക് പ്രവേശിച്ചു. ഇതിനിടെ പ്രതിപക്ഷ കൗണ്‍സിലര്‍മാരെ ഭരണപക്ഷ കൗണ്‍സിലര്‍മാര്‍ അധിക്ഷേച്ചതായും ആരോപണമുണ്ട്. തുടര്‍ന്ന് നഗരസഭാ ചെയര്‍പേഴ്‌സന്റെ ക്യാബിനിലുണ്ടായിരുന്ന ഭരണ പക്ഷ കൗണ്‍സിലര്‍മാരും പുറത്ത് സമരം ചെയ്തിരുന്ന എല്‍ഡിഎഫ് – ബിജെപി കൗണ്‍സിലര്‍മാരും തമ്മില്‍ കയ്യാങ്കളിയുണ്ടായി. സംഘര്‍ഷം രൂക്ഷമായതോടെ മൂവാറ്റുപുഴ പോലീസ് സ്ഥലത്തെത്തി ഇരുപക്ഷതെയും പിന്തിരിപ്പിച്ചുവെങ്കിലും വീണ്ടും പ്രതിഷേധം തുടരുകയായിരുന്നു. പ്രശ്‌നത്തിന് പരിഹാരം കാണുന്നത്് വരെ അനിശ്ചിതകാല സമരം തുടരുമെന്ന് പ്രതിപക്ഷ നേതാവ് മജീദ് മങ്ങാടന്‍, ബിജെപി കൗണ്‍സിലര്‍ ജി. മനോജ് എന്നിവര്‍ പറഞ്ഞു.
ചെയര്‍പേഴ്‌സന്റെ ക്യാബിന് മുന്നില്‍ പ്രതിഷേധിച്ച പ്രതിപക്ഷ കൗണ്‍സിലര്‍മാരെ അക്രമിക്കുന്നവരായി കോണ്‍ഗ്രസ് കൗണ്‍സിലര്‍മാര്‍ മാറിയെന്നും, ഇതിനെതിരെയുള്ള പ്രത്യക്ഷ സമരത്തിലേക്ക് ബിജെപി മുന്നോട്ട് പോകുമെന്നും മണ്ഡലം പ്രസിഡന്റ് ടി. ചന്ദ്രന്‍ പറഞ്ഞു.വനിത കൗണ്‍സിലര്‍മാരെ ഉള്‍പ്പെടെ ഭരണപക്ഷ പുരുഷ കൗണ്‍സിലര്‍മാര്‍ അക്രമിച്ചതായും, ജനങ്ങളെ തമ്മില്‍ വേര്‍തിരിക്കുന്ന നഗരസഭയുടെ നിലപാടിനോട് ശക്തമായ വിയോജിപ്പ് രേഖപ്പെടുത്തുന്നതയായും സിപിഎഎം ഏരിയ സെക്രട്ടറി അനീഷ് എം മാത്യു പറഞ്ഞു.
ഭരണപക്ഷ കൗണ്‍സിലര്‍മാരായ സ്ത്രീകള്‍ ഉള്‍പ്പെടെയുള്ളവരെ പ്രതിപക്ഷ കൗണ്‍സിലര്‍മാര്‍ കയ്യേറ്റം ചെയ്തു എന്നാണ് നഗരസഭ ചെയര്‍പേഴ്‌സണ്‍ ജോയ്‌സ് മേരി ആന്റണി ആരോപിച്ചു. സംഘര്‍ഷത്തിനൊടുവില്‍ ചെയര്‍പേഴ്‌സണ്‍ ജോയിസ് മേരി ആന്റണി ഉള്‍പ്പെടെയുള്ള ഭരണപക്ഷ അംഗങ്ങളും, പ്രതിപക്ഷ അംഗങ്ങളും മൂവാറ്റുപുഴ ജനറല്‍ ആശുപത്രിയില്‍ ചികിത്സ തേടി. ഇരു പക്ഷത്തിന്റെയും പരാതിയില്‍ മൂവാറ്റുപുഴ പോലീസ് കേസെടുത്തു.
