കോതമംഗലം:കോതമംഗലം മാർ അത്തനേഷ്യസ് കോളേജിലെ മൈക്രോബയോളജി, ബയോടെക്നോളജി, ബയോകെമിസ്ട്രി വിഭാഗങ്ങളുടെ സംയുക്താഭിമുഖ്യത്തിൽ പ്ലസ് വൺ, പ്ലസ് ടു വിദ്യാർത്ഥികൾക്കായി സംഘടിപ്പിച്ച ദ്വിദിന ശാസ്ത്ര ശിൽപശാല സമാപിച്ചു.ശിൽപശാലയിൽ സൂക്ഷ്മജീവശാസ്ത്രം, ജനിതകശാസ്ത്രം, ബയോമോളിക്യൂളുകൾ, മോളിക്യുലാർ ബയോളജി, എൻസൈമോളജി, മഷ്റൂം കൾച്ചർ തുടങ്ങിയ മേഖലകളിൽ വിദ്യാർത്ഥികൾക്ക് വിവിധ പ്രായോഗിക പരിശീലനങ്ങൾ നൽകി.
ശാസ്ത്രത്തെ ക്ലാസ് മുറിക്കപ്പുറത്ത് നേരിട്ട് അനുഭവിച്ചറിയുന്നതിനായി വിവിധ സെഷനുകൾ സംഘടിപ്പിച്ചു. ഔഷധസസ്യങ്ങളിൽ നിന്നുള്ള ഘടകങ്ങളുടെ വേർതിരിച്ചെടുക്കൽ, തിൻ ലെയർ ക്രോമാറ്റോഗ്രഫി, ആന്റിബാക്ടീരിയൽ അസേ,മൈക്രോബയൽ കൾച്ചർ, ആന്റിബയോട്ടിക് സെൻസിറ്റിവിറ്റി ടെസ്റ്റിംഗ്, മൈക്രോസ്കോപ്പി, മഷ്റൂം കൾച്ചർ തുടങ്ങിയ പ്രവർത്തനങ്ങളിൽ വിദ്യാർത്ഥികൾ പങ്കെടുത്തു.
ശിൽപശാലയുടെ ഭാഗമായി സംഘടിപ്പിച്ച ബയോസ്പാർക് ഐഡിയത്തോൺ ‘ വിദ്യാർത്ഥികളുടെ ശാസ്ത്രീയ ചിന്തയും നൂതന ആശയങ്ങളും അവതരിപ്പിക്കുന്നതിനുള്ള വേദിയായി. വിവിധ സ്കൂളുകളിൽ നിന്നുള്ള വിദ്യാർത്ഥികൾ പങ്കെടുത്ത ഐഡിയത്തോണിൽ ശാസ്ത്രീയ അറിവ്, പുതുമ, പ്രായോഗികത, സാമൂഹികവും പരിസ്ഥിതിപരവുമായ പ്രസക്തി, അവതരണ മികവ് എന്നിവയുടെ അടിസ്ഥാനത്തിലാണ് വിജയികളെ തെരഞ്ഞെടുത്തത്.
കോതമംഗലം മാർ അത്തനേഷ്യസ് ഇന്റർനാഷണൽ സ്കൂൾ ഒന്നാം സ്ഥാനവും, സെന്റ് ജോസഫ്സ് ഹയർ സെക്കൻഡറി സ്കൂൾ, പൈങ്ങോട്ടൂർ രണ്ടാം സ്ഥാനവും, സെന്റ് അഗസ്റ്റിൻസ് ഹയർ സെക്കൻഡറി സ്കൂൾ, കോതമംഗലം മൂന്നാം സ്ഥാനവും നേടി.
സമാപന ചടങ്ങിൽ മാർ അത്തനേഷ്യസ് കോളേജ് റിസർച്ച് ഡീൻ ഡോ. രാജേഷ് കെ. തുമ്പക്കര ഐഡിയത്തോൺ വിജയികൾക്ക് ക്യാഷ് പ്രൈസുകൾ വിതരണം ചെയ്തു.
വിവിധ സ്കൂളുകളിൽ നിന്നുള്ള പ്ലസ് വൺ, പ്ലസ് ടു വിദ്യാർത്ഥികൾ ശിൽപശാലയിൽ പങ്കെടുത്തു.ഡോ. നിവ്യ മറിയം പോൾ, ഡോ. നയോമി ജോൺ, ഡോ. ജൂലി ജേക്കബ്, പോൾ ജോർജ് എന്നിവർ നേതൃത്വം കൊടുത്തു.
