കോതമംഗലം: സി പി ഐ തൃക്കാരിയൂർ ലോക്കൽ കമ്മറ്റിയംഗം എ.ജി പ്രദീപിനെ മർദിച്ച സി പി എം കാരായ പ്രതികളെ അറസ്റ്റു ചെയ്യണമെന്നാവശ്യപ്പെട്ട് സി പി ഐ മണ്ഡലം കമ്മറ്റിയുടെ നേതൃത്വത്തിൽ കോതമംഗലം നഗരത്തിൽ പ്രതിഷേധ പ്രകടനം നടത്തി.തങ്കളം ആൽ – മാവ് ചുവടിനു മുന്നിൽ നിന്നും ആരംഭിച്ച പ്രകടനം നഗരം ചുറ്റി കോതമംഗലം പ്രൈവറ്റ് ബസ് സ്റ്റാൻ്റിനു മുന്നിൽ സമാപിച്ചു. തുടർന്നു നടന്ന യോഗം സി പി ഐ ജില്ലാ അസിസ്റ്റൻ്റ് സെക്രട്ടറി ഇ.കെ ശിവൻ ഉദ്ഘാടനം ചെയ്തു. തൃക്കാരിയൂർ ലോക്കൽ സെക്രട്ടറി എം.ജി പ്രസാദ്‌ അദ്ധ്യക്ഷത വഹിച്ചു.
മണ്ഡലം സെക്രട്ടറി എം.കെ രാമചന്ദ്രൻ, അസിസ്റ്റൻറ് സെക്രട്ടറി പി.റ്റി ബെന്നി,
സെക്രട്ടറിയേറ്റംഗങ്ങളായ പി.എം ശിവൻ,പി.കെ രാജേഷ്, ലോക്കൽ സെക്രട്ടറിമാരായ അഡ്വ.മാർട്ടിൻ സണ്ണി, അഡ്വ.കെ.എസ് ജ്യോതികുമാർ, പി.എ അനസ്, എം.എസ് അലിയാർ, എ ഐ വൈ എഫ് മണ്ഡലം പ്രസിഡൻറ് റ്റി.എ റിയാസ്, സെക്രട്ടറി എസ്.വിഷ്ണു, എ ഐ എസ് എഫ് ജില്ലാ സെക്രട്ടറി എം.ആർ ഹരികൃഷണൻ, മുൻ പഞ്ചായത്ത് മെംബർ അരുൺ സി ഗോവിന്ദ് എന്നിവർ പ്രസംഗിച്ചു.
നാലുവട്ടം സി പി ഐ സ്ഥാനാർത്ഥി കൾ മത്സരിച്ചു വിജയിച്ച നെല്ലിക്കുഴി പഞ്ചായത്തിലെ ഏഴാം വാർഡിൽ സി പി ഐ സ്ഥാനാർത്ഥിയായ റിയറിജുവിൻ്റെ തെരഞ്ഞെടുപ്പ് യോഗത്തിൽ പങ്കെടുത്തതിൻ്റെ പേരിലാണ് പ്രദീപിനെ സി പി എം പ്രവർത്തകർ മർദിച്ചത്. മുന്നണി മര്യാദ ലംഘിച്ച് വാർഡ് പിടിച്ചെടുക്കാനുള്ള സി പി എമ്മിലെ ചില പ്രാദേശിക നേതാക്കളുടെ രഹസ്യ അജൻഡയാണ് ഇവരുടെ ഒത്താശയോടെ സി പി എം പ്രവർത്തകർ ഭീഷണിയിലൂടെ നടപ്പാക്കാൻ ശ്രമിക്കുന്നതെന്ന് സി പി ഐ നേതാക്കൾ ആരോപിച്ചു.
