കുട്ടമ്പുഴ : രാത്രിയും പകലും നീണ്ടു നിന്ന കനത്ത മഴയെ തുടർന്ന് മണികണ്ഠൻചാൽ പാലം വീണ്ടും വെള്ളത്തിനടിയിലായി. ജനവാസ മേഖലയിലെ താഴ്ന്ന പ്രദേശങ്ങളിൽ ജലനിരപ്പ് ഉയർന്നു തുടങ്ങി. ഏക സഞ്ചാരമാർഗമായ മണികണ്ഠൻചാൽ പാലവും, താഴ്ന്ന പ്രദേശങ്ങളും വെള്ളത്തിനടിയിലായതോടെ നാലോളം ആദിവാസി കോളനികളും, മണികണ്ഠൻചാൽ ഗ്രാമവും ഒറ്റപ്പെട്ടു.
മഴ തുടർന്നാൽ മുൻവർഷങ്ങളിലെപ്പോലെ നിരവധി വീടുകളും, വ്യാപാര സ്ഥാപനങ്ങളും വെള്ളത്തിനടിയിലാകും. മഴക്കാലമായാൽ ഉറക്കമില്ലാത്ത രാത്രികളാണ് പ്രദേശവാസികളെ കാത്തിരിക്കുന്നത്. സഞ്ചാരയോഗ്യമായ പാലം നിർമിക്കണമെന്ന പ്രദേശവാസികളുടെ ആവശ്യത്തിന് വർഷങ്ങളായിട്ടും പരിഹാരമായിട്ടില്ല എന്ന് പൂയംകുട്ടി പള്ളി വികാരി ഫാ.കുര്യാക്കോസ് കണ്ണംപള്ളി പറഞ്ഞു.
