കോതമംഗലം: കുട്ടമ്പുഴ പഞ്ചായത്തിലെ മണികണ്ഠൻ ചാൽ,വെള്ളാരംകുത്ത് തുടങ്ങിയ പ്രദേശങ്ങളിലേക്കും, ആദിവാസി ഊരുകളിലേക്കും പോകുന്നതിന് ആദിവാസികളടക്കം നിരവധി പേർക്ക് പൂയംകുട്ടി പുഴ കടക്കാനുള്ള ഏക ആശ്രയമാണ് മണികണ്ഠൻ ചാൽ ചപ്പാത്ത്. കഴിഞ്ഞ ദിവസങ്ങളിൽ തുടർച്ചയായി പെയ്യുന്ന കനത്ത മഴയിൽ മണികണ്ഠൻ ചാൽ ചപ്പാത്ത് മുങ്ങി.ഇതുമൂലം ആശങ്കയോടെയാണ് പ്രദേശവാസികൾ കഴിയുന്നത് . മുൻ വർഷങ്ങളിലും കനത്ത മഴയെ തുടർന്ന് ചപ്പാത്ത് മുങ്ങുന്നത് പതിവാണ്. എന്നാൽ കൊറോണയും വെള്ളപ്പൊക്കവും ഇരട്ടി പ്രഹരമാണ് പ്രദേശവാസികൾക്ക് ഉണ്ടാക്കുന്നത്.
കോവിഡ് ലോക്ക്ഡൗണ് മൂലം സാമ്പത്തികമായി തകർന്നിരിക്കുന്ന മണികണ്ഠൻ ചാൽ നിവാസികൾക്ക് ജോലിക്ക് പോകാനും മറ്റും ഇതുമൂലം സാധിക്കുന്നില്ല. ലോറിയും, ബസും, മനുഷ്യരും ഉൾപ്പെടെ അനേകം വാഹനങ്ങളും എല്ലാം കടന്ന് പോകുന്ന പാലമാണിത്. വർഷക്കാലത്തുള്ള മലവെള്ള പാച്ചിലിൽ മുങ്ങാറുള്ള ഈ ചപ്പാത്തിൽ നിരവധി വൻ മരങ്ങൾ വന്നടിഞ്ഞു പാലത്തിന്റെ കോൺക്രീറ്റ് ഇളകി ബലക്ഷയം സംഭവിച്ചിട്ടുമുണ്ട്. ഇതിനെല്ലാം പരിഹാരമെന്നോണം പുതിയ പാലം വേണമെന്നാവശ്യത്തിന് വര്ഷങ്ങളുടെ പഴക്കമുണ്ട്. എന്നാൽ പുതിയ പാലം എന്നത് വാഗ്ദാനങ്ങളിൽ മാത്രമായി തുടരുകയാണ്.
