കോതമംഗലം : ഒറ്റയടിക്ക് നാല് കോഴികളെ അകത്താക്കിയ കൂറ്റൻ പെരുമ്പാമ്പിനെ പിടികൂടി; ഇന്ന് ഭൂതത്താൻകെട്ടിലാണ് സംഭവം. ഭൂതത്താൻകെട്ടിൽ ബോട്ട് ജെട്ടിക്കു സമീപമുള്ള വീട്ടിലെ കോഴിക്കൂട്ടിൽക്കയറിയ പെരുമ്പാമ്പ് നാല് കോഴികളെ വിഴുങ്ങുകയും ഒന്നിനെ കൊല്ലുകയും ചെയ്തു. വെളുപ്പിനെ കോഴിക്കൂട്ടിൽ നിന്ന് ബഹളം കേട്ടതിനെ തുടർന്ന് വീട്ടുകാർ നടത്തിയ പരിശോധനയിലാണ് പെരുമ്പാമ്പിനെ കണ്ടത്.
വനപാലകരെ വിവരമറിയിച്ചതിനെ തുടർന്ന് പാമ്പുപിടുത്ത വിദഗ്ദ്ധൻ മാർട്ടിൻ മേക്കമാലി എത്തി പാമ്പിനെ പിടികൂടുകയായിരുന്നു. ഏകദേശം 30 കിലോ തൂക്കവും 12 അടി നീളവുമുള്ള പാമ്പിനെ വനപാലകർ കരിമ്പാ നി വനത്തിൽ തുറന്നു വിട്ടു.
മഴക്കാലത്ത് മലവെള്ളപ്പാച്ചിലിൽ രാജവെമ്പാല ഉൾപ്പെടെയുള്ള പാമ്പുകൾ ഒഴുകിയെത്താൻ സാധ്യതയുള്ളതിനാൽ തീരങ്ങളിൽ താമസിക്കുന്നവർ ജാഗ്രത പാലിക്കേണ്ടതുണ്ട്.
