തിരുവനന്തപുരം: തട്ടേക്കാട് പക്ഷി സങ്കേതത്തിന്റെ സംരക്ഷിത പ്രദേശങ്ങളിലെ ജനവാസ മേഖലകളെ ഒഴിവാക്കുന്നതുമായി ബന്ധപ്പെട്ട് വനം-വന്യജീവി വകുപ്പ് മന്ത്രിയുടെ അധ്യക്ഷതയില് നിയമസഭാ സമുച്ചയത്തില് ചേര്ന്ന ഉന്നതതല യോഗം നിര്ണായക തീരുമാനങ്ങള് കൈക്കൊണ്ടതായി ഷിബു തെക്കുംപുറം എംഎല്എ. തട്ടേക്കാട് പക്ഷി സങ്കേതവുമായി ബന്ധപ്പെട്ട് തയ്യാറാക്കുന്ന ആക്ഷന് പ്ലാനില് പ്രദേശവാസികളുടെ ജീവിതവും ഉപജീവന മാര്ഗങ്ങളും സ്വത്തവകാശങ്ങളും സംരക്ഷിക്കപ്പെടുമെന്ന് യോഗത്തില് മന്ത്രി ഉറപ്പുനല്കിയതായി എംഎല്എ പറഞ്ഞു. ജനവാസ മേഖലകളെ മുഴുവനായി ഒഴിവാക്കിയും പ്രദേശവാസികള്ക്ക് യാതൊരു ബുദ്ധിമുട്ടും ഉണ്ടാകാത്ത രീതിയിലും തുടര്നടപടികള് സ്വീകരിക്കാന് ബന്ധപ്പെട്ട ഉദ്യോഗസ്ഥര്ക്ക് മന്ത്രി നിര്ദേശം നല്കി.
കേന്ദ്ര വന്യജീവി ബോര്ഡിന്റെ നിര്ദേശങ്ങള് പരിഗണിച്ച് തയ്യാറാക്കുന്ന കര്മ്മപദ്ധതിയില് പ്രദേശവാസികളുടെ അഭിപ്രായങ്ങള് കൂടി ഉള്പ്പെടുത്തുന്നതിനും യോഗത്തില് തീരുമാനമായി. ഇതിനായി ജനപ്രതിനിധികള് ഉള്പ്പെട്ട സമിതി പ്രദേശത്തെ ജനങ്ങളുമായി കൂടുതല് ചര്ച്ചകള് നടത്തുകയും അവരുടെ നിര്ദേശങ്ങളും പരാതികളും സര്ക്കാരിന്റെ ശ്രദ്ധയില്പ്പെടുത്തുകയും ചെയ്യും. യോഗത്തില് മേഖലയിലെ ജനങ്ങള് നേരിടുന്ന ആശങ്കകളും വികസന-ജീവിതസൗകര്യങ്ങളുമായി ബന്ധപ്പെട്ട വിഷയങ്ങളും ഷിബു തെക്കുംപുറം എംഎല്എ വിശദമായി അവതരിപ്പിച്ചു. ജനങ്ങളുടെ സൈ്വരജീവിതത്തിന് യാതൊരു തടസവും ഉണ്ടാകരുതെന്നും സംരക്ഷണ പ്രവര്ത്തനങ്ങളും ജനങ്ങളുടെ അവകാശങ്ങളും ഒരുപോലെ സംരക്ഷിക്കുന്ന സമീപനമാണ് സര്ക്കാര് സ്വീകരിക്കേണ്ടതെന്നും എംഎല്എ ആവശ്യപ്പെട്ടു.
ജനവാസ മേഖലകളെ ഒഴിവാക്കുന്നതുമായി ബന്ധപ്പെട്ട നടപടികള് വേഗത്തിലാക്കുമെന്നും, പ്രദേശവാസികളുടെ ആശങ്കകള്ക്ക് പരിഹാരം കാണുന്ന തരത്തില് തുടര്നടപടികള് സ്വീകരിക്കുമെന്നും മന്ത്രി യോഗത്തില് വ്യക്തമാക്കി. യോഗത്തില് ഡീന് കുര്യാക്കോസ് എംപി, ചീഫ് വൈല്ഡ് ലൈഫ് വാര്ഡന് ഡോ. പ്രമോദ് ജി. കൃഷ്ണന് ഐ.എഫ്.എസ്, കുട്ടമ്പുഴ ഗ്രാമപഞ്ചായത്ത് പ്രസിഡന്റ് മേരി കുര്യാക്കോസ്, ജില്ലാ പഞ്ചായത്ത് അംഗം സൗമ്യ ശശി, ബ്ലോക്ക് പഞ്ചായത്ത് അംഗം ചിഞ്ചു ബിബി, ഗ്രാമപഞ്ചായത്ത് അംഗങ്ങളായ കാന്തി വെള്ളക്കയ്യന്, ശ്രീജിത്ത് ശിവന് എന്നിവരും പങ്കെടുത്തു.
