കോതമംഗലം: കോതമംഗലം നിയോജകമണ്ഡലത്തില് കോട്ടപടി പഞ്ചായത്തിലെ കണ്ണക്കട, കല്ലുളി, കൈതപ്പാറ, കൂവകണ്ടം പ്രദേശങ്ങളില് ജനവാസമേഖലയിലും കൃഷിയിടങ്ങളിലും നാശം സൃഷ്ടിക്കുന്ന ആനയെ മയക്കു വെടി വെച്ച് പിടികൂടി പ്രദേശത്ത് നിന്നും നീക്കം ചെയ്യുന്നത് സംബന്ധിച്ച് ആന്റണി ജോണ് എംഎല്എ ഉന്നയിച്ച സബ്മിഷനുള്ള മറുപടി നല്കി വനം വകുപ്പ് മന്ത്രി എ.കെ ശശീന്ദ്രന്.
മലയാറ്റൂര് ഡിവിഷനിലെ കോടനാട് റെയിഞ്ചിലെ മേക്കപ്പാല ഫോറസ്റ്റ് സ്റ്റേഷന് പരിധിയില് കുറുബാനപ്പാറ, കൂവക്കണ്ടം, കണ്ണക്കട, കല്ലുളി, കൈതപ്പാറ ഭാഗത്ത് അവശനിലയില് ഒരു പെണ് കാട്ടാനയെ കണ്ടെത്തിയിരുന്നു. കോട്ടപ്പാറ റിസര്വ്വിനുള്ളിലെ കുറുവാനപ്പാറ എന്ക്ലോഷറില്പ്പെട്ട സ്ഥലമാണ് ഈ പ്രദേശം. വനമേഖലയില് നിന്നും ആര്കെഡിപി പദ്ധതിയില് ചേര്ന്ന് ഒഴിഞ്ഞുപോയ കുടുംബങ്ങള് കൂടാതെ 13 കുടുംബങ്ങളാണ് ഇപ്പോള് അവിടെ നിലവിലുള്ളത്. അവശനിലയില് കണ്ടെത്തിയ കാട്ടാനയെ 24/01/2026ല് കോടനാട് അഭയാരണ്യത്തിലെ അസിസ്റ്റന്റ് ഫോറസ്റ്റ് വെറ്ററിനറി ഓഫീസര് നിരീക്ഷിക്കുകയും കാട്ടാന ക്ഷീണിതയാണെന്ന് ബോധ്യപ്പെടുകയും ചെയ്തിരുന്നു.
തുടര്ന്നുള്ള ദിവസങ്ങളില് നിരീക്ഷണം ശക്തമാക്കുകയും ആനയുടെ ആരോഗ്യസ്ഥിതി മെച്ചപ്പെടുന്നതായി ബോധ്യപ്പെടുകയും ചെയ്തിട്ടുണ്ട്. കാട്ടാനയുടെ സാന്നിദ്ധ്യം കുറുബാനപ്പാറ, കൂവക്കണ്ടം, കണ്ണക്കട, കൈതപ്പാറ പരിസരങ്ങളില് കാണപ്പെട്ടതിനെത്തുടര്ന്ന് അതിനെ സുരക്ഷിതമായി ഉള്ക്കാട്ടിലേക്ക് തുരത്തുവാനുള്ള ശ്രമങ്ങള് നടത്തുന്നുണ്ട്. നിലവില് കാട്ടാനയെ മയക്കുവെടി വയ്ക്കുന്നതിനുള്ള ആരോഗ്യാവസ്ഥ ഇല്ലാത്തതിനാല് വനം വകുപ്പ് ഉദ്യോഗസ്ഥര് പ്രദേശവാസികളുമായും ജനപ്രതിനിധികളുമായി ചര്ച്ച നടത്തുകയും ജാഗ്രതാനിര്ദ്ദേശം നല്കുകയും ചെയ്തിട്ടുണ്ട്.
ആനയെ നിരന്തരം നിരീക്ഷിക്കുന്നതിന് ഉദ്യോഗസ്ഥരെ നിയോഗിക്കുകയും ജനവാസ മേഖലയിലേക്ക് ആന ഇറങ്ങുന്ന പക്ഷം സ്ഥിതിഗതികള് സുരക്ഷിതമായി നിയന്ത്രിക്കുന്നതിനും, ഉചിതമായ നടപടികള് കൈക്കൊള്ളുന്നതിനും ഉദ്യോഗസ്ഥര്ക്ക് വേണ്ട നിര്ദ്ദേശം നല്കിയിട്ടുണ്ട്. ആനയെ കാട്ടിലേക്ക് തുരത്തുന്നതിലേക്കുമായി ആര്ആര്ടിയെ വിന്യസിക്കുകയും ചെയ്തിട്ടുണ്ടെന്നും മന്ത്രി എ കെ ശശീന്ദ്രന് സബ്മിഷന് മറുപടിയായി നിയമസഭയില് അറിയിച്ചു.
