പെരുമ്പാവൂര്: പെരുമ്പാവൂരില് ഹൈബ്രിഡ് കഞ്ചാവ് പിടികൂടിയ കേസില് മുഖ്യപ്രതികളായ അന്തര്ദേശീയ ലഹരിമരുന്ന് ശൃംഖലയിലെ പ്രധാനികള് പിടിയില്. പാലക്കാട് മുണ്ടൂര് പുതനൂര് പള്ളിപ്പറമ്പില് അബു താഹിര് (39), ഒറ്റപ്പാലം തൃക്കടീരി വലിയപറമ്പില് ഹരികൃഷ്ണന് (25), പാലക്കാട് കടമ്പഴിപ്പുറം അത്താണിപ്പറമ്പില് പ്രസ്ജിത്ത്(40), ഒറ്റപ്പാലം പനമണ്ണ തെക്കേതില് ശ്രീജേഷ്(41), ഒറ്റപ്പാലം ചളവറ പരിയാംതൊടി പി. സഞ്ജയ് (22) എന്നിവരെയാണ് സംസ്ഥാനത്തിന്റെ വിവിധ ഭാഗങ്ങളില് നിന്നായി ജില്ലാ പോലീസ് മേധാവി കെ.എസ്. സുദര്ശന്റെ നേതൃത്വത്തിലുള്ള അന്വേഷണ സംഘം പിടികൂടിയത്.
പ്രധാന പ്രതിയായ അബു താഹിറിനെ ബംഗളൂരുവില് നിന്നാണ് പോലീസ് പിടികൂടിയത്. ഇന്ത്യക്കകത്തും പുറത്തുമുള്ള ലഹരിമരുന്ന് വിതരണ ശൃംഖലയെ കേന്ദ്രീകരിച്ച് നടത്തിയ വിശദമായ അന്വേഷണത്തിനൊടുവിലാണ് പ്രതികളെ പിടികൂടിയത്. തായ്ലന്ഡിലെ വിവിധ എയര്പോര്ട്ടുകള് വഴി കേരളത്തിലേക്ക് ഹൈബ്രിഡ് കഞ്ചാവ് എത്തിക്കുന്ന അന്താരാഷ്ട്ര മയക്കുമരുന്ന് ശൃംഖലയിലെ ഉന്നതരാണിവര്.
പ്രതികളില് നിന്ന് മൊബൈല് ഫോണുകള്, ബാങ്ക് ഇടപാടുകളുടെ രേഖകള്, വിദേശ യാത്രാ രേഖകള് ,ഡിജിറ്റല് തെളിവുകള് എന്നിവ പോലീസ് പിടിച്ചെടുത്തിട്ടുണ്ട്. അബു താഹിറും ഹരികൃഷ്ണനും തായ്ലന്ഡിലേക്ക് വിസയും ടിക്കറ്റും പ്രതിഫലവും നല്കി ഏജന്റുകളെ അയക്കും. അവര് തിരികെ എത്തുമ്പോള് ഹൈബ്രിഡ് കഞ്ചാവുമായി വരും. ഇത് എയര്പോര്ട്ടിന് പുറത്തുവച്ച് സംഘം വാങ്ങും. ഓപ്പറേഷന് തൂഫാന്റെ ഭാഗമായി 17 കിലോ ഹൈബ്രിഡ് കഞ്ചാവുമായി ഞാറക്കല് അഴീക്കല് മാനാട്ടുപറമ്പ് അരൂക്കാട് ആയുഷ് (39), ഭാര്യ അനിക (30) എന്നിവരെ നേരത്തെ പിടികൂടിയിരുന്നു.
