കോതമംഗലം:വേട്ടാമ്പാറ ജനവാസമേഖലയില് വീണ്ടും കാട്ടാന. പടിപ്പാറയിലെ പൈനാപ്പിള് തോട്ടത്തിലാണ് വ്യാഴാഴ്ച കാട്ടാന എത്തിയത്. വനപാലകരെത്തി ആനയെ വനത്തിലേക്ക് തുരത്തി. ചൊവ്വാഴ്ച ഈ ആന കോട്ടപ്പടി മുട്ടത്തുപാറയിലെത്തിയിരുന്നു. അവിടെനിന്ന് കാടുകയറി ബുധനാഴ്ച മാലിപ്പാറ-കുളങ്ങാട്ടുകുഴി റോഡില് മണിക്കൂറൂകളോളം തമ്പടിച്ചു. ആനയെ രാത്രി കോട്ടപ്പാറ പ്ലാന്റേഷനിലേക്ക് കയറ്റിവിട്ടതായാണ് വനംവകുപ്പ് ഉദ്യോഗസ്ഥര് അറിയിച്ചത്. എന്നാല്, ആന വീണ്ടും ജനവാസമേഖലയിലെത്തുകയായിരുന്നു. സ്ഥിരം നാട്ടിലിറങ്ങുന്ന ആനയാണെന്ന് അറിയാമായിരുന്നിട്ടും നിരീക്ഷണത്തിന് നടപടിയുണ്ടായില്ലെന്ന് പരാതിയുണ്ട്.
