കോതമംഗലം: കോഴിപ്പിള്ളിക്ക് സമീപം വാട്ടര് അതോറിറ്റിയുടെ പ്രധാന പൈപ്പ് ലൈന് തകര്ന്ന് വീടുകളിലേക്ക് വെള്ളം ഇരച്ചു കയറി. റോഡിലെ ടാറിംഗ് തകര്ന്ന് ഗര്ത്തം രൂപപ്പെടുകയും ചെയ്തിട്ടുണ്ട്. ശനിയാഴ്ച രാവിലെയാണ് കോഴിപ്പിള്ളി പാലത്തിനും പമ്പ് ഹൗസിനും ഇടയില് പൈപ്പ് പൊട്ടിയത്. പമ്പ് ഹൗസില് നിന്ന് അമ്പല പറമ്പിലെ ടാങ്കിലേക്കുള്ള പ്രധാന പൈപ്പ് ലൈനാണ് തകര്ന്നത്.
ഇരച്ചെത്തിയ വെള്ളം സമീപത്തെ വീടിനകത്തേക്ക് കയറുകയും സാധന സാമഗ്രികള് നനഞ്ഞ് പോവുകയും ചെയ്തു. വെള്ളത്തിന്റെ ശക്തമായ ഒഴുക്കില് റോഡില് ഗര്ത്തം രൂപപ്പെടുകയും ചെയ്തു.വീട്ടുകാര് അറിയിച്ചതിനെ തുടര്ന്ന് വാട്ടര് അതോറിറ്റി മോട്ടര് ഓഫ് ചെയ്തതോടെയാണ് നീരൊഴുക്ക് നിലച്ചത്. പൈപ്പ് പൊട്ടിയതോടെ നഗരത്തിലെ ശുദ്ധജല വിതരണം തടസപ്പെടുകയും ചെയ്തു.
