കോതമംഗലം: കുട്ടമ്പുഴ പഞ്ചായത്തിലെ ആദിവാസി ഊരുകളായ വെള്ളാരംകുത്ത്, കത്തിപ്പാറ, ഉറിയംപെട്ടി, തേക്കല്ല്, വെട്ടിക്കല്ല്, മഞ്ചപ്പാറ എന്നിവിടങ്ങളില് ചൊവ്വാഴ്ചയുണ്ടായ ശക്തമായ കാറ്റിലും മഴയിലും കാട്ടുമരങ്ങള് വീണ് ഗതാഗതം തടസ്സപ്പെട്ടു. ഊരുകളിലേക്കുള്ള റോഡിലേക്കാണ് നൂറ്റമ്പത് ഇഞ്ചോളം വണ്ണമുള്ള 30 ഓളം കാട്ടുമരങ്ങള് വീണ് രണ്ട് വാഹനങ്ങളിലായി 12 ഓളം ആദിവാസികള് വനത്തില് കുടുങ്ങിയത്.
തുടര്ന്ന് കോതമംഗലം അഗ്നി രക്ഷാ നിലയത്തില് നിന്നും സ്റ്റേഷന് ഓഫീസര് മുഹമ്മദ് അജ്മല് ഷായുടെ നേതൃത്വത്തിലുള്ള സംഘം സംഭവസ്ഥലത്തെയും വെള്ളാരംകുത്ത് മുതല് 37 കിലോമീറ്റര് ദൂരത്തില് മുപ്പതോളം മരങ്ങള് മുറിച്ചുമാറ്റി വനത്തില് കുടുങ്ങിയവരെ അവരുടെ വീടുകളില് സുരക്ഷിതമായി എത്തിക്കുകയും ചെയ്തു.
ചൊവ്വാഴ്ച രത്രിയാണ് രണ്ടു വാഹനങ്ങളിലായി 12 ഓളം പേര് വനത്തില് കുടുങ്ങിയത്. സേന സംഭവ സ്ഥലത്ത് എത്തുന്നതിന് മുന്നേ വാഹനങ്ങളില് കുടുങ്ങിയവര് മരം വെട്ടാന് ശ്രമിക്കുന്നതിനിടെ ജീപ്പ് ഡ്രൈവറുടെ കാലിന് പരിക്കേറ്റിരുന്നു.
സീനിയര് ഫയര് ഓഫീസര് സിദ്ദിഖ് ഇസ്മായില്, ഫയര് ആന്ഡ് റെസ്ക്യൂ ഓഫീസര്മാരായ കെ.പി ഷമീര്, പി.കെ ശ്രീജിത്ത്, ഒ.ജി രാകേഷ് കുമാര്, കെ.കെ രജീഷ്, ഹോം ഗാര്ഡ് പി ബിനു എന്നിവരാണ് സംഘത്തില് ഉണ്ടായിരുന്നത്. കൂടാതെ ഫോറസ്റ്റ് വകുപ്പിലെ ഉദ്യോഗസ്ഥരും സംഭവസ്ഥലത്ത് സേനയോടൊപ്പം ഉണ്ടായിരുന്നു.
