കോതമംഗലം: വെള്ളത്തില് മുങ്ങിത്താഴ്ന്ന രണ്ട് വയസുകാരന് രക്ഷകയായ 10 വയസുകാരി സഹറാ ഫാത്തിമയ്ക്ക് അഗ്നിരക്ഷാസേനയുടെ ആദരവ്. കഴിഞ്ഞ ഒന്നിന് നെല്ലിക്കുഴി സദ്ദാം നഗര് കാപ്പുചിറയ്ക്ക് സമീപം കുളിക്കടവിലായിരുന്നു അപകടം. മലപ്പുറം സ്വദേശികളായ മാതാപിതാക്കള്ക്കൊപ്പം കാപ്പുചിറയ്ക്ക് സമീപത്തുള്ള ബന്ധുവീട്ടില് വിരുന്നെത്തിയതായിരുന്നു രണ്ടു വയസുള്ള മുഹമ്മദ് റൈസാന്.
മാതാപിതാക്കള് അറിയാതെ കുളിക്കടവിലെ സ്റ്റെപ്പിലൂടെ ഇറങ്ങിയ കുട്ടി വെള്ളത്തില് മുങ്ങിത്താഴുകയായിരുന്നു. ഈ സമയം സൈക്കിള് ചവിട്ടി അതുവഴി കടന്നുപോകുകയായിരുന്ന സഹ്റ ഫാത്തിമ അപകടം കാണുകയും ഉടന്തന്നെ വെള്ളത്തില് ഇറങ്ങി പിഞ്ചുകുഞ്ഞിന്റെ ഉടുപ്പില് പിടിച്ച് കരയ്ക്ക് കയറ്റി കുട്ടിയെ രക്ഷപ്പെടുത്തുകയായിരുന്നു.
നെല്ലിക്കുഴി കാപ്പുചിറ കാപ്പുചാലി വീട്ടില് നൗഫല്- സബീന ദമ്പതികളുടെ മകളാണ് സഹറാ ഫാത്തിമ.സംഭവം ദീപക റിപ്പോര്ട്ട് ചെയ്തിരുന്നു. കോതമംഗലം അഗ്നിരക്ഷാനിലയത്തില് നടന്ന ചടങ്ങില് സ്റ്റേഷന് ഓഫീസര് മുഹമ്മദ് അജ്മല്ഷാ സഹറാ ഫത്തിമയെ പൊന്നാടയണിയിച്ചും അസിസ്റ്റന്റ് സ്റ്റേഷന് ഓഫീസര് സതീഷ് ജോസ് മൊമന്റോ നല്കിയും ആദരിച്ചു. കോതമംഗലം നിലയത്തിലെ സേനാഅംഗങ്ങള് ചടങ്ങില് പങ്കെടുത്തു.
