മൂവാറ്റുപുഴ: കൈക്കൂലി വാങ്ങുന്നതിനിടെ അറസ്റ്റിലായ ലാന്ഡ് റവന്യൂ തഹസില്ദാറിനെയും ഏജന്റുമാരെയും റിമാന്ഡ് ചെയ്ത് മൂവാറ്റുപുഴ വിജിലന്സ് കോടതി. കണയന്നൂര് തഹസില്ദാര് ജോസഫ് ആന്റണി, രണ്ട് ഏജന്റുമാരായ ഷിബിന്, കണ്ണന് എന്ന രാജേഷ് എന്നിവരെയാണ് മൂവാറ്റുപുഴ വിജിലന്സ് കോടതി ജഡ്ജി ജി രാജേഷ് 24-ാം തീയതിവരെ റിമാന്ഡ് ചെയ്തത്. എളമക്കര സ്വദേശിയുടെ ഭൂമി ഇടപാടുമായി ബന്ധപ്പെട്ട് 10 ലക്ഷം രൂപ കൈക്കൂലി വാങ്ങുന്നതിനിടെയാണ് വ്യാഴാഴ്ച കണയന്നൂര് തഹസില്ദാര് ജോസഫ് ആന്റണിയെ വിജിലന്സിന്റെ എറണാകുളം യൂണിറ്റ് കടവന്ത്രയില് നിന്ന് പിടികൂടിയത്.
എളമക്കര സ്വദേശിയില്നിന്ന് പത്തുലക്ഷം രൂപയാണ് ഏജന്റുമാര് മുഖേന കൈക്കൂലി ആവശ്യപ്പെട്ടിരുന്നത്. കൃഷി ഭൂമി പുരയിടമാക്കി രേഖകള് നല്കാനാണ് വ്യാജപരാതിക്കാരനെ സൃഷ്ടിച്ച് കൈക്കൂലി ആവശ്യപ്പെട്ടത്. സ്ഥലം ഉടമ നേരത്തെ മുതല് പുരയിടം എന്ന നിലയില് കരം അടച്ചുവരുന്ന ഭൂമിയായിരുന്നു വില്പനയ്ക്ക് ശ്രമിച്ചപ്പോള് കൃഷി ഭൂമിയാണെന്ന് വ്യക്തമായത്. കൃഷി മണ്ണിട്ട് നികത്തിയത് അടക്കം ചൂണ്ടിക്കാട്ടി തഹസില്ദാര് ജോസഫ് ആന്റണിയുടെ സഹായി തന്നെയാണ് പരാതി നല്കിയത്.
പ്രശ്നപരിഹാരത്തിനു സ്ഥലം ഉടമ ജോസഫ് ആന്റണിയെ സമീപിച്ചപ്പോള് പരാതിക്കാരനുമായുള്ള ഒത്തുതീര്പ്പിനും കൃഷി ഭൂമി പുരയിടമാക്കി രേഖ നല്കാനും പത്തുലക്ഷം രൂപ കൈക്കൂലി ആവശ്യപ്പെട്ടു. രണ്ട് ലക്ഷം രൂപ പണമായും എട്ട് ലക്ഷം രൂപയുടെ ചെക്കുമാണ് നല്കിയത്. കൂടുതല് റവന്യൂ ഉദ്യോഗസ്ഥര് ഇടപാടിന്റെ ഭാഗമാണോയെന്ന് വിജിലന്സ് വിശദമായ അന്വേഷണം നടത്തും. പ്രതികളുടെ ജാമ്യാപേക്ഷ 17ന് മൂവാറ്റുപുഴ കോടതി പരിഗണിക്കും
