കോതമംഗലം: ഉപജില്ല സ്‌കൂള്‍ കലോത്സവത്തില്‍ എല്‍പി ജനറല്‍ വിഭാഗത്തിലും, അറബിക് കലോത്സവത്തിലും ഓവറോള്‍ ഒന്നാം സ്ഥാനം കരസ്ഥമാക്കിയ മൈലൂര്‍ എംഎല്‍പി സ്‌കൂളില്‍ വിജയോത്സവം നടത്തി. സ്‌കൂള്‍ മാനേജര്‍ യൂസഫ് മുളാട്ട് ഉദ്ഘാടനം ചെയ്തു. പിടിഎ വൈസ് പ്രസിഡന്റ് അബൂബക്കര്‍ മാങ്കുളം അധ്യക്ഷത വഹിച്ചു. ഹെഡ്മാസ്റ്റര്‍ ജോസ് മാനുവല്‍, സ്‌കൂള്‍ അഡ്മിനിസ്‌ട്രേറ്റര്‍ ഷൈനി യൂസഫ്, എംപിടിഎ ചെയര്‍പേഴ്‌സണ്‍ ഷാനി അലി തുടങ്ങിയവര്‍ അനുമോദിച്ചു.
എല്‍പി വിഭാഗം ജനറല്‍ കലോത്സവത്തിലും, അറബിക് കലോത്സവത്തിലും എംഎല്‍പി സ്‌കൂള്‍ മുഴുവന്‍ പോയിന്റും കരസ്ഥമാക്കി. തുടര്‍ച്ചയായി 24 -ാം വര്‍ഷമാണ് അറബിക് ഓവറോള്‍ കിരീടം സ്‌കൂള്‍ നിലനിര്‍ത്തുന്നത്. അധ്യാപകര്‍, രക്ഷിതാക്കള്‍, വിദ്യാര്‍ത്ഥികള്‍ എന്നിവരെ പ്രത്യേകം അനുമോദിക്കുകയും മധുര പലഹാരങ്ങള്‍ വിതരണം ചെയ്യുകയും ചെയ്തു.
