കോതമംഗലം: കോതമംഗലം നഗരസഭയിലെ കുമ്പളത്തുമുറി ഡംബ്ബിങ് യാർഡിൽ വർഷങ്ങളായി കുന്നുകൂടിക്കിടക്കുന്ന പഴയ മാലിന്യങ്ങൾ ശാസ്ത്രീയമായി നീക്കം ചെയ്യുന്ന ബയോമൈനിംഗ് പ്രവർത്തനങ്ങൾക്ക് ബുധനാഴ്ച തുടക്കമാകും. രാവിലെ 10.30-ന് നടക്കുന്ന ചടങ്ങിൽ പദ്ധതിയുടെ ഉദ്ഘാടനം നഗരസഭ ചെയർപേഴ്സൺ ഭാനുമതി രാജു നിർവഹിക്കും. നഗരസഭാ വൈസ് ചെയർപേഴ്സൺ പ്രിൻസ് വർക്കി അധ്യക്ഷത വഹിക്കും.
പഴയ മാലിന്യ നിക്ഷേപ കേന്ദ്രങ്ങൾ ശാസ്ത്രീയമായി വീണ്ടെടുത്ത് പരിസ്ഥിതി സൗഹൃദവും പൊതുജനങ്ങൾക്ക് പ്രയോജനകരവുമായ ഇടങ്ങളാക്കി മാറ്റുന്നതിനുള്ള സമഗ്ര പദ്ധതിയാണ് നടപ്പാക്കുന്നത്.
കുമ്പളത്തുമുറി ഡംബ്ബിങ് യാർഡിൽ ഏകദേശം 27000 ടൺ പഴയ മാലിന്യമാണ് ബയോമൈനിംഗ് പ്രക്രിയയിലൂടെ നീക്കം ചെയ്യുന്നത്. പദ്ധതിയുടെ നിർവഹണ കരാർ എസ്.എം.എസ് ലിമിറ്റഡ് എന്ന കമ്പനിക്കാണ് നൽകിയിരിക്കുന്നത്.
പ്രത്യേക യന്ത്രസാമഗ്രികളുടെ സഹായത്തോടെ പഴയ മാലിന്യങ്ങൾ ശാസ്ത്രീയമായി വേർതിരിച്ച് സംസ്കരിക്കുന്നതാണ് ബയോമൈനിംഗ് പ്രക്രിയ. വീണ്ടെടുക്കാൻ കഴിയുന്ന പുനരുപയോഗ വസ്തുക്കൾ റീസൈക്ലിംഗിനായി കൈമാറുകയും മറ്റ് മാലിന്യ ഘടകങ്ങൾ പരിസ്ഥിതി മാനദണ്ഡങ്ങൾ പാലിച്ച് സംസ്കരിക്കുകയും ചെയ്യും.
35 വർഷങ്ങളായി കുമ്പളത്തുമുറിയിലെ ഡബ്ബിങ് യാർഡിൽ കുമിഞ്ഞു കൂടി കിടക്കുന്ന മാലിന്യ കൂമ്പാരം ഒഴിവാക്കുന്നത് വഴി പ്രദേശ വാസികളുടെ നിരന്തരമായ ആവശ്യത്തിനു പരിഹാരമാകും. മാലിന്യനീക്കം പൂർത്തിയാകുന്നതോടെ പരിസര മലിനീകരണം ഒഴിവാക്കുന്നതിനും, വീണ്ടെടുക്കുന്ന ഭൂമി ഭാവിയിൽ നഗരസഭയുടെ വിവിധ പൊതുപ്രയോജന പദ്ധതികൾക്കായി വിനിയോഗിക്കാനും സാധിക്കും.
