കോതമംഗലം: വളവ് തിരിയുന്നതിനിടെ സ്വകാര്യ ബസില് നിന്ന് റോഡിലേക്ക് തെറിച്ചുവീണ് ഗുരുതരമായി പരിക്കേറ്റ് ചികിത്സയിലായിരുന്ന കന്യാസ്ത്രീ മരിച്ചു. അഗതികളുടെ സഹോദരിമാരുടെ സന്യാസിനി സമൂഹം (എസ്ഡി) കോതമംഗലം സെന്റ് വിന്സന്റ് പ്രൊവിന്സ് അംഗമായ സി. ഹെയ്സ്ലെറ്റ് (56) ആണ് ബുധനാഴ്ച രാവിലെ മരിച്ചത്. ചൊവ്വാഴ്ച രാവിലെ 8.20 ഓടെ കോഴിപ്പിള്ളി ഗവ. എല്പി സ്കൂളിന് സമീപത്തെ വളവിലായിരുന്നു അപകടം.
ബസ് ജീവനക്കാര് വാതില് അടക്കാതെ സര്വീസ് നടത്തിയതാണ് ദുരന്തത്തിന് ഇടയാക്കിയതെന്നാണ് ആക്ഷേപം. വാഴക്കുളത്ത് നിന്ന് കോതമംഗലത്തേക്ക് വരികയായിരുന്ന സ്വകാര്യ ബസില് എസ്ഡി പ്രൊവിന്ഷ്യല് ഹൗസിന് സമീപത്തുള്ള ബോയ്സ് ടൗണ് സ്റ്റോപ്പില് നിന്നുമാണ് സി. ഹെയ്സ്ലെറ്റ് കയറിയത്. തൊട്ടടുത്ത സ്റ്റോപ്പായ പോത്താനിക്കാടിന് തിരിയുന്ന കവലയില് നിന്നും ആളുകളെ കയറ്റി ഏതാനും മീറ്റര് മുന്നോട്ട് നീങ്ങി കോഴിപ്പിള്ളി വളവ് വീശിയെടുത്തപ്പോഴാണ് ഹെയ്സ്ലെറ്റ് പുറത്തേക്ക് തെറിച്ചുവീണത്.
അപകടത്തില് തലയ്ക്ക് ഗുരുതരമായി പരിക്കേറ്റ് അബോധാവസ്ഥയിലായ സി. ഹെയ്സ്ലെറ്റിനെ ഉടന് തന്നെ നാട്ടുകാരും യാത്രക്കാരും ചേര്ന്ന് കോതമംഗലം സെന്റ് ജോസഫ് ധര്മഗിരി ആശുപത്രിയില് എത്തിച്ചിരുന്നു. എന്നാല് പരിക്ക് ഗുരുതരമായതിനാല് വിദഗ്ദ്ധ ചികിത്സയ്ക്കായി പിന്നീട് ആലുവ രാജഗിരി ആശുപത്രിയിലേക്ക് മാറ്റിയെങ്കിലും ബുധനാഴ്ച രാവിലെയോടെ ജീവന് നഷ്ടപ്പെടുകയായിരുന്നു.
രാജപുരം പുത്തേട്ട് കുടുബാഗമായ സി. ഹെയ്സ്ലെറ്റ് അധ്യാപികയായിരുന്നു. ഊന്നുകല് ലിറ്റില് ഫ്ലവര് ഹൈസ്കൂളില് നിന്നും കഴിഞ്ഞ അധ്യയന വര്ഷം അവസാനമാണ് സര്വീസില് നിന്നും വിരമിച്ചത്. മൂവാറ്റുപുഴ നെസ്റ്റ് പാസ്റ്ററല് സെന്ററില് നടക്കുന്ന ഒരു യോഗത്തില് പങ്കെടുക്കാന് പോകുന്നതിനിടയിലാണ് അപകടം. സംഭവത്തില് കോതമംഗലം പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. അശ്രദ്ധമായി വാതില് തുറന്നിട്ട് സര്വീസ് നടത്തിയ ബസ് ജീവനക്കാര്ക്കെതിരെ ശക്തമായ നടപടി വേണമെന്നാണ് നാട്ടുകാരുടെ ആവശ്യം.
