കോതമംഗലത്ത് വീണ്ടും കഞ്ചാവ് വേട്ട; രണ്ടരക്കിലോ കഞ്ചാവുമായി യുവാവ് പിടിയിൽ.

കോതമംഗലം:- രണ്ടരക്കിലോ കഞ്ചാവുമായി യുവാവ് കോതമംഗലത്ത് പിടിയിൽ. ഇന്ന് ശനിയാഴ്ച്ച രാത്രിയാണ് പ്രതി എക്സൈസിൻ്റെ പിടിയിലായത്. കുട്ടമംഗലം, തേൻകോട് സ്വദേശി റിൻസ് (25) ആണ് രണ്ടരക്കിലോ കഞ്ചാവുമായി പിടിയിലായത്. തങ്കളത്ത് വച്ച് കൈയിൽ ബിഗ് ഷോപ്പറുമായി കണ്ട പ്രതിയെ സംശയം തോന്നിയ എക്സൈസ് ചോദ്യം ചെയ്യുകയായിരുന്നു. മുമ്പ് കഞ്ചാവ് കേസുമായി ബന്ധപ്പെട്ട് പ്രതിയെ ഓഫീസിൽ വിളിച്ചു വരുത്തിയിട്ടുള്ളതിനാൽ എക്സൈസിന് പ്രതിയെ മുഖ പരിചയം തോന്നിയതാണ് വഴിത്തിരിവായത്.തുടർന്ന് ബിഗ് ഷോപ്പറിനുള്ളിൽ നിന്ന് രണ്ടര കിലോ കഞ്ചാവ് കണ്ടെടുക്കുകയായിരുന്നു.

പെരുമ്പാവൂരിൽ നിന്നാണ് പ്രതി കഞ്ചാവ് കൊണ്ടുവന്നത് എന്ന് എക്സൈസ് സർക്കിൾ ഇൻസ്പെക്ടർ ജോസ് പ്രതാപ് പറഞ്ഞു. പ്രിവൻ്റീവ് ഓഫീസർ നിയാസ്, സിദ്ധിഖ്, ജിമ്മി, അനൂപ്, എൽദോ, ഉമ്മർ, വിജു പോൾ എന്നിവരും അന്വേഷണ സംഘത്തിലുണ്ടായിരുന്നു.