കോതമംഗലം: കോതമംഗലത്ത് കൊട്ടിഘോഷിച്ച് ഉദ്ഘാടനം നടത്തിയ ഷീ ലോഡ്ജ് അഞ്ച് മാസം പിന്നിടുമ്പോഴും അടഞ്ഞുകിടക്കുന്നു.മന്ത്രി പി.രാജീവ് ആയിരുന്നു ഉദ്ഘാടകന്‍.എന്നാല്‍ ഉദ്ഘാടനം നടത്തിയതല്ലാതെ ഇതുവരെ ഒരു പ്രയോജനവുമുണ്ടായില്ല.
തങ്കളം ബസ് സ്റ്റാന്‍റിനോടനുബന്ധിച്ചാണ് ഷീ ലോഡ്ജ് തുറന്നത്. ലക്ഷങ്ങള്‍ മുടക്കിയാണ് കെട്ടിടം നിര്‍മ്മിച്ചത്. മുനിസിപ്പല്‍ തെരഞ്ഞെടുപ്പിന് തൊട്ടുമുമ്പുള്ള ഉദ്ഘാടന പരമ്പരയില്‍പ്പെടുത്തിയാണ് ഷീ ലോഡ്ജിന്‍റേയും ഉദ്ഘാടനം നടത്തിയത്. തെരഞ്ഞെടുപ്പിന് മുമ്പുള്ള തട്ടിക്കൂട്ട് ഉദ്ഘാടനമായിരുന്നു ഇതെന്ന് പിന്നീട് വ്യക്തമായി. ആവശ്യമായ പണികളൊന്നും പൂര്‍ത്തീകരിക്കാതെയാണ് മന്ത്രിയെ കൊണ്ട് ഷീ ലോഡ്ജ് ഉദ്ഘാടനം നടത്തിച്ചത്.
ഫര്‍ണ്ണീച്ചറുകള്‍ മാത്രമല്ല, വൈദ്യുതി കണക്ഷന്‍ പോലും ഇവിടെയില്ല.ഉദ്ഘാടനം നടത്തുമ്പോഴുള്ള ഭരണ നേതൃത്വം അല്ല ഇപ്പോൾ നഗരസഭയുടേത്.അന്ന് എല്‍ഡിഎഫ് ആണ് മുനസിപ്പാലിറ്റി ഭരിച്ചിരുന്നത്. പണികൾ പൂർത്തികരിച്ച് പൂർണ്ണ സജ്ജമാക്കിയെ പ്രവർത്തനം ആരംഭിക്കാനാകൂയെന്നാണ് ഇപ്പോഴത്തെ ഭരണസമിതി വ്യക്തമാക്കുന്നത്.
