കോതമംഗലം :കോതമംഗലം മുൻസിപ്പൽ കൗൺസിലറും, സിപിഐഎം നേതാവുമായ കെ വി തോമസ് പോക്സോ കേസിൽ അറസ്റ്റിലായി. കേസ് എടുത്ത് ഉടനെ സ്റ്റേഷനിൽ വിളിച്ചുവരുത്തി അറസ്റ്റ് രേഖപ്പെടുത്തി. പത്താം ക്ലാസ് വിദ്യാർത്ഥിനിയെ പീഡനത്തിന് ഇരയാക്കാൻ ശ്രമിച്ചു എന്നാണ് കേസ്. കഴിഞ്ഞ മാർച്ച് മാസവും ഈ മാസവുമാണ് കേസിന് ആസ്പദമായ സംഭവം ഉണ്ടായത്.കോതമംഗലം പോലീസ് കുട്ടിയുടെ മൊഴിയെടുത്ത ശേഷം കേസ് എടുത്തു. തുടർച്ചയായി മൂന്ന് തവണയാണ് കെ വി തോമസ് കൗൺസിലർ ആയത്.സിപിഐഎം ബ്രാഞ്ച് സെക്രട്ടറിയും,ലോക്കൽ കമ്മിറ്റി അംഗവുമാണ്. മുമ്പ് ബന്ധുവായി യുവതിയെ പീഡിപ്പിച്ചു എന്ന കേസിനും ഇയാൾ പ്രതിയായിട്ടുണ്ട്.
സദാചാര വിരുദ്ധ പ്രവർത്തനത്തിന്റെ പേരിൽ പോലീസ് കേസിൽ പ്രതിയായ സിപിഐഎം അംഗവും, കോതമംഗലം മുനിസിപ്പൽ കൗൺസിലറുമായ കെ വി തോമസിനെ പാർട്ടിയുടെ പ്രാഥമിക അംഗത്തിൽ നിന്നും പുറത്താക്കിയതായും,മുനിസിപ്പൽ കൗൺസിൽ സ്ഥാനം രാജിവെക്കാൻ ആവശ്യപ്പെട്ടതായും സിപിഐഎം കോതമംഗലം ഏരിയ സെക്രട്ടറി കെ എ ജോയി അറിയിച്ചു.
