കോതമംഗലം : കോതമംഗലത്തു വീണ്ടും കഞ്ചാവ് വേട്ട. രണ്ട് കിലോ കഞ്ചാവുമായി യുവാവ് പിടിയിൽ. മൂന്നാർ സ്വദേശി 19 കാരനായ ഫെലിക്സാണ് പിടിയിലായത്. ബാഗിൽ സൂക്ഷിച്ചിരുന്ന രണ്ട് കിലോ കഞ്ചാവും പിടിച്ചെടുത്തു. ഒപ്പമുണ്ടായിരുന്ന കോതമംഗലം സ്വദേശിയായ ആൾ ഓടി രക്ഷപെട്ടു. കോതമംഗലം എക്സ്സൈസ് സർക്കിൾ ഇൻസ്പെക്ടർ എ ജോസ് പ്രതാപും സംഘവും മാമലകണ്ടം ഭാഗത്തേക്ക് പട്രോൾ പോകുന്നതിനിടയിൽ കുട്ടമ്പുഴ ആറാം മൈൽ ചെക്ക് പോസ്റ്റിൽ നിന്ന് ഉദ്ദേശം രണ്ടു കിലോമീറ്റർ മാറി നിർത്തിയിട്ട ബൈക്കിൽ രണ്ടു പേര് ഇരുന്നു സിഗരറ്റു വലിക്കുന്നത് കണ്ടു സംശയം തോന്നി പരിശോധന നടത്തിയപ്പോഴാണ് പ്രതി പിടിയിലായത്.
ഡിപ്പാർട്മെന്റ് വാഹനം ബൈക്കിന് സമീപം നിർത്തുന്നതിനിടയിൽ ബൈക്കിന്റെ പുറകിലിരുന്ന കോതമംഗലം സ്വദേശി വനത്തിനുള്ളിലേക്ക് ഓടി രക്ഷപെടുകയും ബൈക്കിന് മുന്നിലിരുന്ന മൂന്നാർ സ്വദേശി പ്ലാക്കൽ വീട്ടിൽ ഫെലിക്സിന്റെ (19)ഷോൾഡർ ബാഗ് വാങ്ങി പരിശോധിച്ചതിൽ ഉദ്ദേശം 2 കിലോയോളം കഞ്ചാവ് കണ്ടെടുത്തു. ഓടി രക്ഷപെട്ട കോതമംഗലം സ്വദേശി മറ്റൊരാളിൽ നിന്ന് 20000 രൂപയ്ക്ക് വാങ്ങിയാണ് ഫെലിക്സിനു നൽകിയത്.
ഫെലിക്സ് മൂന്നാറിലെ ഹോം സ്റ്റേയിലും മറ്റും വര്ഷങ്ങളായി വ്യാപകമായി കഞ്ചാവ് വില്പന നടത്തുന്നയാളാണെന്ന് എക്സൈസ് സർക്കിൾ ഇൻസ്പെക്ടർ ജോസ് പ്രതാപ് പറഞ്ഞു. ഇന്ന് പ്രതിയെ കോടതിയിൽ ഹാജരാക്കി റിമാൻഡ് ചെയ്തു. എക്സ്സൈസ് സംഘത്തിൽ സർക്കിൾ ഇൻസ്പെക്ടർ എ ജോസ് പ്രതാപ്, നിയാസ്, ശ്രീകുമാർ, സുനിൽ, ജിമ്മി, ബിജു, ജയൻ എന്നിവർ ഉണ്ടായിരുന്നു.
