തൊടുപുഴ: പൊതുസ്ഥലത്ത് ലഹരി ഉപയോഗിക്കുന്നതിനിടെ തൊടുപുഴ നഗരസഭാ മുന് അധ്യക്ഷനും കോണ്ഗ്രസ് നേതാവുമായ സനീഷ് ജോര്ജ് പിടിയില്. ‘ഓപ്പറേഷന് തൂഫാന്’ പ്രത്യേക അന്വേഷണ സംഘമാണ് സനീഷ് ജോര്ജിനെ പിടികൂടിയത്. കോടിക്കുളത്ത് റോഡരികിലെ ഒഴിഞ്ഞ പ്രദേശത്ത് വാഹനം നിര്ത്തി ലഹരി ഉപയോഗിക്കുന്നുവെന്ന രഹസ്യവിവരത്തെ തുടര്ന്നാണ് പോലീസ് സംഘം സ്ഥലത്തെത്തിയത്. പോലീസ് എത്തുമ്പോഴേക്കും സനീഷ് ലഹരി ഉപയോഗിച്ചു കഴിഞ്ഞിരുന്നു. ലഹരി ഉപയോഗിക്കാന് ഉപയോഗിച്ച പൈപ്പുകളും ട്യൂബുകളും ഇയാളില് നിന്ന് കണ്ടെടുത്തിട്ടുണ്ട്. എന്നാല് ഏത് തരം ലഹരിമരുന്നാണ് ഉപയോഗിച്ചതെന്ന് വ്യക്തമായിട്ടില്ല. സംഭവ സമയത്ത് ഇയാള്ക്കൊപ്പം ഒരു സുഹൃത്തും ഉണ്ടായിരുന്നു.
തൊടുപുഴ നഗരസഭാ അധ്യക്ഷനായിരുന്ന കാലത്തും നിരവധി വിവാദങ്ങളില് പെട്ടിട്ടുള്ള വ്യക്തിയാണ് സനീഷ് ജോര്ജ്. മുന്പ് കഞ്ചാവ് കൈവശം വെച്ചതിനും കൈക്കൂലി കേസില് അകപ്പെട്ടതിനും ഇയാള്ക്കെതിരെ കേസുകളുണ്ട്. കഴിഞ്ഞ തദ്ദേശ തെരഞ്ഞെടുപ്പില് സീറ്റ് നിഷേധിച്ചതിനെ തുടര്ന്ന് കോണ്ഗ്രസുമായി അകന്ന സനീഷ് ജോര്ജ് പിന്നീട് സ്വതന്ത്രനായി മത്സരിക്കുകയും ഇടത് പിന്തുണയോടെ നഗരസഭാ അധ്യക്ഷനാവുകയുമായിരുന്നു. എന്നാല് കൈക്കൂലി കേസില്പ്പെട്ടതോടെ അധ്യക്ഷസ്ഥാനം രാജിവെക്കേണ്ടി വന്നു. സംഭവത്തില് പ്രത്യേക അന്വേഷണ സംഘം വിശദമായ അന്വേഷണം ആരംഭിച്ചിട്ടുണ്ട്.
