കോതമംഗലം : കോതമംഗലത്തിൻ്റെ ടൂറിസം മേഖലയ്ക്ക് വൻ വികസന സാധ്യത തുറക്കുന്ന നേര്യമംഗലം ബോട്ട് ജെട്ടി യാഥാർഥ്യത്തിലേക്ക്. ജെട്ടിയുടെ നിർമ്മാണ പ്രവർത്തനങ്ങൾ അന്തിമ ഘട്ടത്തിലാണ്. ആന്റണി ജോൺ എം.എൽ.എയുടെ ആസ്തി വികസന ഫണ്ടിൽ നിന്നും അനുവദിച്ച 50 ലക്ഷം രൂപ വിനിയോഗിച്ചാണ് ജെട്ടിയുടെ നിർമ്മാണം.

നേര്യമംഗലം പാലത്തിനു സമീപം പുഴയുടെ ഇടതു കരയിലാണ് പുതിയ ബോട്ട് ജെട്ടി ക്രമീകരിച്ചിരിക്കുന്നത്. മൂന്ന് ലെവൽ ലാന്റിങ്ങ് ഫ്ലോറോട് കൂടിയുള്ള ബോട്ട് ജെട്ടിയാണിത്. പരീക്ഷണാടിസ്ഥാനത്തിൽ കഴിഞ്ഞ ദിവസം ഇവിടെ ബോട്ട് അടുപ്പിച്ചിരുന്നു. പെരിയാർ വാലിയുടെ നേതൃത്വത്തിലാണ് നിർമ്മാണ പ്രവർത്തനങ്ങൾ പുരോഗമിക്കുന്നത്.

മൂന്നാർ, തേക്കടി തുടങ്ങി ഇടുക്കിയിലെ വിവിധ ടൂറിസം കേന്ദ്രങ്ങളിലേക്ക് പോകുന്നവർക്ക് കോതമംഗലത്ത് നിന്നും ഭൂതത്താൻകെട്ടിൽ എത്തി അവിടെ നിന്ന് ബോട്ട് മാർഗം കുട്ടമ്പുഴ, തട്ടേക്കാട്, ഇഞ്ചത്തൊട്ടി പ്രദേശങ്ങളെല്ലാം കണ്ട് നേര്യമംഗലത്ത് എത്തിച്ചേർന്ന് അവിടെ നിന്നും വീണ്ടും യാത്ര തുടരാം.

അതുപോലെ തന്നെ തിരിച്ച് ഇടുക്കി ഭാഗത്ത് നിന്നും വരുന്നവർക്ക് നേര്യമംഗലത്ത് ഇറങ്ങിയാൽ അവിടെ നിന്ന് ബോട്ട് വഴി ഭൂതത്താൻകെട്ടിൽ എത്താം. പെരിയാറിന്റെ വശ്യ ഭംഗി ആസ്വദിക്കുന്നതോടൊപ്പം വന്യ മൃഗങ്ങളെ അടുത്ത് കാണാനുള്ള അവസരവും യാത്ര സമ്മാനിക്കും. ടൂറിസം സർക്യൂട്ട് അടക്കം ലക്ഷ്യമിട്ടു കൊണ്ടാണ് നേര്യമംഗലത്ത് ഇത്തരത്തിലുളള പദ്ധതി ആവിഷ്കരിച്ച് നടപ്പിലാക്കുന്നത്.

കോതമംഗലം : കേരളത്തിലെ ഏറ്റവും വലിയ കട്ടൗട്ട് എന്ന് അവകാശപ്പെട്ടുകൊണ്ട് കോട്ടപ്പടിയിലെ പോർച്ചുഗൽ ആരാധകർ. റൊണാൾഡോയുടെ ഏറ്റവും വലിയ കട്ടൗട്ടർ എന്ന് അവകാശപ്പെട്ടുകൊണ്ട് എറണാകുളം ജില്ലയിലെ കോട്ടപ്പടി പഞ്ചായത്തിലെ ഒരുപറ്റം പോർച്ചുഗൽ ആരാധകരായ ചെറുപ്പക്കാരാണ് സ്ഥാപിച്ചിരിക്കുന്നത്. ലോകകപ്പ് ഫുട്ബോൾ പടിവാതിൽക്കൽ വന്നിരിക്കുന്ന സാഹചര്യത്തിൽ വിവിധ രാജ്യങ്ങളുടെയും കളിക്കാരുടെയും ഫാൻസുകാർ കൊടിതോരണങ്ങളും ഫ്ളക്‌സുകളുമാണ് പോരാട്ട വീര്യത്തോടെ പാതയോരങ്ങളിൽ സ്ഥാപിച്ചിരിക്കുന്നത്.

ഒരാഴ്ചയോളം നീണ്ടുനിന്ന കഠിനാധ്വാനത്തിന്റെ ഫലമായാണ് പോർച്ചുഗൽ ഫാൻസുകാർക്ക് 80 അടിയോളം ഉയരമുള്ള കൂറ്റൻ കട്ടൗട്ട് സ്ഥാപിക്കാനായത്. ക്രയിൻ ഉപയോഗിച്ചാണ് കട്ടൗട്ട് സ്ഥാപിച്ചത്. കൃഷിയിടത്തിലെ തെങ്ങിനേക്കാൾ ഉയരത്തിലാണ് കട്ടൗട്ട് നിലകൊള്ളുന്നത്. ഫുട്ബോളിനെ ജീവശ്വാസത്തെക്കാൾ വലുതായി സ്നേഹിക്കുന്ന ഒരുപറ്റം ചെറുപ്പക്കാരാണ് കോട്ടപ്പടി തുരങ്കം കവലയിൽ ലോകകപ്പിന്റെ ആവശമുൾക്കൊണ്ടുകൊണ്ട് തങ്ങളുടെ ടീമിന്റെ വിജയം ആശംസിച്ചുകൊണ്ട് നാട്ടുവഴികൾ പോലും ഫുട്ബോൾ ആവേശത്തിൽ നിറക്കുന്നത്.

പോർച്ചുഗൽ ആരാധകരോട് കിടപിടിക്കുന്ന രീതിയിൽ ഹോളണ്ടിന്റെയും അർജന്റീനയുടെയും ഫ്രാൻസിന്റെയും ആരാധകർ അവരവരുടെ ടീമുകളുടെ വലിയ പോസ്റ്ററുകളാണ്കോട്ടപ്പടി പാനിപ്രയുടെ വഴിയോരങ്ങളിൽ സ്ഥാപിച്ചിട്ടുള്ളത്. ഹത്തറിൽ ലോകകപ്പ് തുടങ്ങുമ്പോൾ തുരങ്കം കവലയിലും, കോട്ടപ്പടി ചേറങ്ങനാൽ കവലയിലും വലിയ സ്ക്രീൻ ഒരുക്കി കളികാണുവാനുള്ള ഒരുക്കത്തിലാണ് ഫുട്ബോൾ ആരാധകരെന്ന് കോതമംഗലം ഫുട്ബോൾ ക്ലബ് സെക്രട്ടറിയും കോട്ടപ്പടി ഫുട്ബോൾ അക്കാദമി കോച്ചുമായ ബോബി തറയിൽ വെളിപ്പെടുത്തി.

കോതമംഗലം : കോതമംഗലം സ്വദേശികൾക്ക് സുപരിചിതനായ വ്യക്തിയാണ് അനുര മത്തായി. നെല്ലിക്കുഴി കുറ്റിലഞ്ഞിക്കാരൻ കോതമംഗലം എം എ ആർട്സ് ആൻഡ് സയൻസ് കോളേജിലെ പഠനകാലത്ത് വിവിധ സാമൂഹിക സാംസ്‌കാരിക പ്രവർത്തനങ്ങളിൽ സജീവമായിരുന്ന വിദ്യാർത്ഥി കൂടിയായിരുന്നു. കോളേജിന്റെ ചെയർമാൻ സ്ഥാനം നിരവധി തവണ അലങ്കരിച്ച നേതാവ് കൂടിയാണ് അനുര മത്തായി. തുടർന്ന് സിനിമ മേഖലയിൽ പ്രവർത്തിച്ചെങ്കിലും ജോലി സംബന്ധമായി ദുബായിലേക്ക് ചേക്കേറുകയായിരുന്നു.

ഒന്നിച്ചു പഠിച്ച നാല് സുഹൃത്തുക്കളായ സ്റ്റാൻലി (നിവിൻ പോളി), അജിത് (സിജു), ജസ്റ്റിൻ (സൈജു), സുനിൽ (അജു)  ബാച്ചിലർ നാളിൽ ഇവർ ഒന്നിച്ചൊരു കളർഫുൾ വീക്കെൻഡ് ആഘോഷിക്കാൻ ഇട്ട പ്ലാൻ ചില കാരണങ്ങൾ കൊണ്ട് നടക്കാതെ നീളുന്നതും , അതിനെത്തുടർന്നുണ്ടാകുന്ന സംഭവ വികാസങ്ങളുമായാണ് സിനിമ. ‘കായംകുളം കൊച്ചുണ്ണിക്ക്‌’ ശേഷം റോഷൻ ആൻഡ്രൂസ്- നിവിൻ പോളി കൂട്ടുകെട്ടിൽ പിറന്ന ‘സാറ്റർഡേ നൈറ്റ്’ സിനിമയിലാണ് അനുര മത്തായി നിവിൻ പോളിയുടെ കഥാപാത്രമായ സ്റ്റാൻലിയുടെ വില്ലനായി സിനിമയിൽ അഭിനയിച്ചിരിക്കുന്നത്. അതി സമ്പന്നനായ വിജയ് റായിയുടെ(അനുര മത്തായി) മകളുമായി സ്റ്റാൻലി പ്രണത്തിലാകുന്നതും തുടർന്നുണ്ടാകുന്ന സംഘർഷങ്ങളുമായാണ് സിനിമ മുന്നേറുന്നത്.

വൻ താര നിരയുമായി അണിയിച്ചൊരുക്കിയിരിക്കുന്ന സൗഹൃദങ്ങളിൽ ചാലിച്ച ‘സാറ്റർഡേ നൈറ്റ്’ കോതമംഗലം ആൻ സിനിമാസിൽ നിറഞ്ഞ സദസിലാണ് പ്രദർശിപ്പിക്കുന്നത്. സുഹൃത്തിനെ ബിഗ് സ്‌ക്രീനിൽ കാണുവാൻ സാധിച്ചതിൽ അഭിമാനമുണ്ടെന്ന് റിജോ കുര്യൻ ചുണ്ടാട്ട് വെളിപ്പെടുത്തുന്നു. ചാർട്ടേർഡ് വിമാനങ്ങളും നിരവധി ബിസിനസ് സംരംഭങ്ങളും നടത്തുന്ന വിജയ് റായി എന്ന കഥാപാത്രത്തെ തന്മയത്തത്തോടെ അവതരിപ്പിക്കുവാൻ അനുരയുടെ ശരീരഭാഷ വലിയ പങ്കുവഹിക്കുകയും ചെയ്‌തിട്ടുള്ളതായി കോതമംഗലത്തെ പ്രേക്ഷകർ ചൂണ്ടിക്കാണിക്കുന്നു. ജീവിതത്തിൽ സൗഹൃദങ്ങൾക്ക് വളരെയധികം ഇഴയടുപ്പം സൂക്ഷിച്ചിരുന്ന അനുര മത്തായി ബിഗ് സ്ക്രീനിൽ നിറഞ്ഞുനിൽക്കുന്നത് വലിയ അഭിമാനമായി മാറിയിരിക്കുകയാണ് കൂട്ടുകാർക്ക്.