കോതമംഗലം: നെല്ലിമറ്റത്ത് കെഎസ്ആർടിസി ബസും കവളങ്ങാട് പിക്കപ് വാനും ഇലക്ട്രിക് പോസ്റ്റിലിടിച്ച് അപകടം. ഇന്നലെ ഉച്ചയ്ക്ക് പന്ത്രണ്ടോടെയാണ് രണ്ട് അപകടങ്ങളും. നെല്ലിമറ്റം സെന്റ് ജോസഫ്സ് പള്ളിക്കു സമീപമുള്ള വളവിൽ കുമളിയിൽ നിന്ന് എറണാകുളത്തേക്ക് പോവുകയായിരുന്ന ഫാസ്റ്റ് പാസഞ്ചർ ബസ് മഴയുള്ള സമയത്താണ് അപകടത്തിൽപെട്ടത്.
എതിർ ദിശയിൽ വന്ന ഓട്ടോറിക്ഷയിൽ ഇടിക്കാതെ ബ്രേക്ക് ചെയ്തപ്പോൾ തെന്നിമാറി പിൻഭാഗം ഇലക്ട്രിക് പോസ്റ്റിൽ ഇടിച്ച് ബസ് റോഡിനു കുറുകെയായി. ഇലക്ട്രിക് പോസ്റ്റ് ഒടിഞ്ഞ് ബസിനു മുകളിൽ പതിച്ചു. ദേശീയപാതയിൽ ഗതാഗതം തടസ്സപ്പെട്ടതോടെ നെല്ലിമറ്റം-കണ്ണാടിക്കോട് -മാരമംഗലം-കുത്തുകുഴി വഴി വാഹനങ്ങൾ തിരിച്ചുവിട്ടു. അഗ്നിരക്ഷാസേനയും കെഎസ്ഇബി അധികൃതരുമെത്തി പോസ്റ്റ് നീക്കംചെയ്ത് ഒരു മണിക്കൂർ നീണ്ട പരിശ്രമത്തിനൊടുവിലാണ് ഗതാഗതം പുനഃസ്ഥാപിച്ചത്.
കവളങ്ങാട് പിക്കപ് വാൻ ഇലക്ട്രിക് പോസ്റ്റിൽ ഇടിക്കുകയായിരുന്നു. ഡ്രൈവർ ഉറങ്ങിയതാകാം അപകടകാരണമെന്ന് പറയുന്നു. രണ്ട് അപകടങ്ങളിലും ആർക്കും പരുക്കില്ല.
