കോതമംഗലം: കൊച്ചി – ധനുഷ്കോടി ദേശീയപാതയില്‍ നേര്യമംഗലം ആറാം മൈലിനും ചീയപ്പാറ വെള്ളച്ചാട്ടത്തിനുമിടയില്‍ ഓടിക്കൊണ്ടിരുന്ന കാറിന് തീപിടിച്ചു. വാഹനത്തിന് തീ പിടിക്കുമ്പോള്‍ ഡ്രൈവര്‍ ഉള്‍പ്പെടെ മൂന്നുപേര്‍ ഉണ്ടായിരുന്നെങ്കിലും ആളപായമില്ല. കൊല്ലം കുലശേഖരപുരം കുന്നത്ത് കിഴക്കാട്ടില്‍ ഷൗക്കത്തിന്റെ കാറാണ് കത്തിനശിച്ചത്.
ഹൈദരാബാദ് സ്വദേശികളായ ദമ്പതികളെ എറണാകുളത്തുനിന്നും മൂന്നാറിലേക്ക് വിനോദസഞ്ചാരത്തിന്റെ ഭാഗമായി കൊണ്ടുപോകുന്നതിനിടയില്‍ കാറിന് തീപിടിക്കുകയായിരുന്നു. പുക ഉയരുന്നത് ശ്രദ്ധയില്‍പെട്ട ഉടന്‍തന്നെ യാത്രക്കാരെയും, അവരുടെ ബാഗുകളും അനുബന്ധ സാധനങ്ങളും വാഹനത്തില്‍ നിന്നും പുറത്തെത്തിച്ചു. ഷോട്ട് സര്‍ക്യൂട്ടാണ് തീപിടുത്തത്തിന് കാരണമെന്നാണ് പ്രാഥമിക നിഗമനം.അടിമാലി, നേര്യമംഗലം എന്നിവിടങ്ങളില്‍ നിന്നും അഗ്നി രക്ഷാ സേന സംഭവസ്ഥലത്ത് എത്തി തീ അണച്ചു.
