കോതമംഗലം: നിയോജക മണ്ഡലത്തിലെ ഗ്രാമപഞ്ചായത്ത്, ബ്ലോക്ക് പഞ്ചായത്ത് പ്രസിഡന്റുമാര്‍, വൈസ് പ്രസിഡന്റുമാര്‍, ജില്ലാ പഞ്ചായത്ത് അംഗങ്ങള്‍, എന്നിവരുടെ യോഗം ഷിബു തെക്കുംപുറം എംഎല്‍എയുടെ നേതൃത്വത്തില്‍ നിര്‍ദിഷ്ട എംഎല്‍എ ഓഫീസില്‍ ചേര്‍ന്നു. ഈ സര്‍ക്കാര്‍ അധികാരത്തില്‍ വന്നതിന് ശേഷം ആദ്യമായാണ് തദ്ദേശ സ്ഥാപനങ്ങളുടെ ജനപ്രതിനിധികളെ ഉള്‍പ്പെടുത്തി ഇത്തരമൊരു ഏകോപന യോഗം സംഘടിപ്പിക്കുന്നത്.
നിയോജക മണ്ഡലത്തിലെ വികസന പ്രവര്‍ത്തനങ്ങള്‍ കൂടുതല്‍ കാര്യക്ഷമമായി മുന്നോട്ടുകൊണ്ടുപോകുന്നതിനും ജനകീയ പ്രശ്‌നങ്ങള്‍ നേരിട്ട് മനസ്സിലാക്കി പരിഹാരം കാണുന്നതിനുമാണ് യോഗം ചേര്‍ന്നത്. ഓരോ പഞ്ചായത്തിലെയും വികസന ആവശ്യങ്ങളും ജനങ്ങള്‍ നേരിടുന്ന വിവിധ പ്രശ്‌നങ്ങളും പഞ്ചായത്ത് പ്രസിഡന്റുമാര്‍ യോഗത്തില്‍ എംഎല്‍എയുടെ ശ്രദ്ധയില്‍പ്പെടുത്തി.
മണ്ഡലത്തില്‍ നിരവധി വികസന പദ്ധതികള്‍ മുന്നോട്ടുകൊണ്ടുപോകുന്നതിനുള്ള തീരുമാനങ്ങള്‍ യോഗത്തില്‍ കൈക്കൊണ്ടു. ജനപ്രതിനിധികള്‍ ഉന്നയിച്ച വിഷയങ്ങള്‍ പരിഗണിച്ച് അടിയന്തരമായി പരിഹരിക്കേണ്ട പ്രശ്‌നങ്ങള്‍ക്ക് സമയബന്ധിതമായി പരിഹാരം കാണുന്നതിനുള്ള നടപടികളുമായി മുന്നോട്ടുപോകുമെന്ന് എംഎല്‍എ അറിയിച്ചു. അടിയന്തര പ്രാധാന്യമുള്ള ജനകീയ വിഷയങ്ങള്‍ക്കും പ്രധാന വികസന പദ്ധതികള്‍ക്കും മുന്‍ഗണന നല്‍കാനും യോഗം നിര്‍ദേശിച്ചു.
എംഎല്‍എ ഫണ്ടിന്റെ വിനിയോഗവും യോഗം വിശദമായി വിലയിരുത്തി. ഓഗസ്റ്റ് മാസം മുതല്‍ നിയോജക മണ്ഡലത്തിലെ ഓരോ പ്രദേശങ്ങളെയും ലക്ഷ്യമാക്കി എംഎല്‍എ ഫണ്ട് വിനിയോഗിക്കുന്നതിനുള്ള പ്രവര്‍ത്തനങ്ങള്‍ ആരംഭിക്കും. പ്രദേശങ്ങളുടെ ആവശ്യകതയും അടിയന്തര പ്രാധാന്യവും കണക്കിലെടുത്തായിരിക്കും പദ്ധതികള്‍ക്ക് മുന്‍ഗണന നല്‍കുക.
കോതമംഗലം മണ്‍സൂണ്‍ ഫെസ്റ്റിവലിനോടനുബന്ധിച്ചുള്ള വിവിധ പരിപാടികളും പ്രവര്‍ത്തനങ്ങളും യോഗത്തില്‍ ചര്‍ച്ച ചെയ്തു. ഇതോടൊപ്പം ഓണത്തോടനുബന്ധിച്ച് നിയോജക മണ്ഡലത്തിലെ വിവിധ തദ്ദേശ സ്ഥാപനങ്ങളുടെ സഹകരണത്തോടെ സംഘടിപ്പിക്കേണ്ട പരിപാടികളുടെ ആസൂത്രണവും നടന്നു. ജനകീയ പങ്കാളിത്തത്തോടെ വിപുലമായ പരിപാടികള്‍ സംഘടിപ്പിക്കുന്നതിനുള്ള നിര്‍ദേശങ്ങളും യോഗത്തില്‍ ഉയര്‍ന്നു.
മണ്ഡലത്തിലെ വികസന പ്രവര്‍ത്തനങ്ങളും ജനകീയ വിഷയങ്ങളും തുടര്‍ച്ചയായി വിലയിരുത്തുന്നതിനും തദ്ദേശ സ്ഥാപനങ്ങളുമായി കൂടുതല്‍ ഫലപ്രദമായ ഏകോപനം ഉറപ്പാക്കുന്നതിനുമായി എല്ലാ മാസവും രണ്ടാമത്തെ ശനിയാഴ്ച തദ്ദേശ ജനപ്രതിനിധികളുടെ യോഗം ചേരാനും തീരുമാനിച്ചു. ഗ്രാമപഞ്ചായത്ത്, ബ്ലോക്ക് പഞ്ചായത്ത് പ്രസിഡന്റുമാര്‍, വൈസ് പ്രസിഡന്റുമാര്‍, ജില്ലാ പഞ്ചായത്ത് അംഗങ്ങള്‍ എന്നിവര്‍ യോഗത്തില്‍ പങ്കെടുത്തു.
