കോതമംഗലം: കീരംപാറ സെന്റ് സെബാസ്റ്റ്യൻസ് ഇടവക നിർമ്മിച്ച് നൽകുന്ന രണ്ട് സ്‌നേഹ ഭവനങ്ങളുടെ താക്കോൽ ദാനം വിശുദ്ധ അൽഫോൻസാമ്മയുടെ തിരുനാളിനോട് അനുബന്ധിച്ച് സീറോ മലബാർ സഭയുടെ ആദ്യ കൂരിയാ ബിഷപ്പും ഓസ്ട്രേലിയ മെൽബൺ രൂപതയുടെ പ്രഥമ മെത്രാനുമായിരുന്ന ബിഷപ്പ് എമിരറ്റസ് മാർ ബോസ്കോ പുത്തൂർ നിർവ്വഹിച്ചു.
ഇടവകയിലെ അൽഫോൻസാ കുടുംബക്കൂട്ടായ്മ യൂണിറ്റിൻ്റെ നേതൃത്വത്തിൽ നടത്തിയ വിശുദ്ധ അൽഫോൻസാമ്മയുടെ തിരുന്നാളിന് മാർ ബോസ്കോ പുത്തൂർ മുഖ്യ കാർമ്മികത്വം വഹിച്ചു. പുതുതായി
നിർമ്മിച്ചുനൽകുന്ന 11 -ാം മത് സ്നേഹഭവനത്തിൻ്റെ കല്ല് ബിഷപ്പ് വെഞ്ചിരിച്ചു.
പൊതുസമ്മേളനത്തിൽ വികാരി ഫാ. മാത്യു കൊച്ചുപുരയ്ക്കൽ അധ്യക്ഷത വഹിച്ചു. മാതൃവേദി രൂപതാ കലോത്സവത്തിൽ സ്കിറ്റിന് രണ്ടാം സ്ഥാനം കരസ്ഥമാക്കിയ മാതൃവേദി കീരംപാറ യൂണിറ്റിനുള്ള അവാർഡ് ബിഷപ്പ് വിതരണം ചെയ്തു. മിഷൻ സ്റ്റാറായി തിരഞ്ഞെടുക്കപ്പെട്ട മിഷൻ ലീഗ് കീരംപാറ ശാഖയെ അവാർഡ് നൽകി ബിഷപ്പ് ആദരിച്ചു. കീരംപാറ ഇടവക നിർമ്മിച്ച് നൽകുന്ന ഒൻപതാമത്തെയും പത്താമത്തെയും സ്നേഹഭവനങ്ങളുടെ താക്കോൽദാനമാണ് ചടങ്ങിൽ നിർവ്വഹിച്ചത്. മൈക്കിൾ തെക്കേക്കുടി, ജെയിംസ് തെക്കേക്കര, ജോസ് കച്ചിറയിൽ , ജിൻസി ജോമോൻ,കെ.വി മോളി ., ജോൺസൺ കറുകപ്പിള്ളിൽ, ഷോജി കണ്ണമ്പുഴ, ജിജി പുളിക്കൽ, ഡിമ്പിൾ ഷോജി എന്നിവർ നേതൃത്വം നൽകി.
